ଗଞ୍ଜାମ: ହୁମା ହାଟ ପଡ଼ିଆଠାରୁ ଅଳ୍ପ ଦୂର ୧୬ ନମ୍ବର ଜାତୀୟ ରାଜପଥରେ ଏକ କାରରେ ଗଂଜେଇ ଚଲାଣ ବେଳେ ରମ୍ଭା ପୁଲିସ ଗାଡିକୁ ଜବତ କରିବା ସହ ଦୁଇ ଜଣକୁ ଗିରଫ କରିଛି। ସେମାନେ ହେଲେ ସନାତନ ଦଳେଇ ଏବଂ ଜୀନୁ ଅଧିକାରୀ। ଦୁହେଁ ଗଜପତି ମୋହନା ଅଂଚଳର ବୋଲି ପୁଲିସ ସୂଚନା ଦେଇଛି। କାରରୁ ପୁଲିସ ପ୍ରାୟ ୨୨ କେଜି ଗଂଜେଇ ଜବତ କରିଛି। ଏ ନେଇ ରମ୍ଭା ଥାନାରେ ଏକ ମାମଲା ରୁଜୁ ହୋଇଛି।
ସୂଚନା ଅନୁସାରେ, ରମ୍ଭା ଥାନା ଅଧିକାରୀ କୁମାର ମୁଦୁଲିଙ୍କ ନେତୃତ୍ୱରେ ପୁଲିସ ପାଟ୍ରୋଲିଂ କରୁଥିବା ସମୟରେ ଗାଡିମୋଟର ଯାଞ୍ଚ ହେଉଥିଲା। ପୁଲିସକୁ ଦେଖି କାରଟି ହଠାତ ଦ୍ରୁତ ଗତିରେ ଆଗକୁ ମାଡିଯାଇଥିଲା। ଯାହାକୁ ନେଇ ପୁଲିସର ସନ୍ଦେହ ବଢ଼ି ଯାଇଥିଲା। ପୁଲିସ କାରକୁ ପିଛା କରି ତାକୁ ଅଟକାଇଥିଲା। ଗାଡିଟି ମୋହନାରୁ ଭୁବନେଶ୍ୱର ଅଭିମୁଖେ ଯାଉଥିଲା। କାର ଯାଞ୍ଚ କରାଯିବା ପରେ ସେଥିରୁ ପ୍ରାୟ ୨୨ କେଜିରୁ ଅଧିକ ଗଞ୍ଜେଇ ମିଳିଥିଲା।
