ପିପିଲି :ପିପିଲି ବିଧାନସଭା ଆସନରେ ସ୍ୱାଧିନ ଭାବେ ନିର୍ବାଚନ ଲଢିବେ ରାଧାମୋହନ। ଡେଲାଙ୍ଗ ପିପିଲି ଜନକଲ୍ୟାଣ ମଞ୍ଚର ଆବାହକ ଥିବା ଯୁବ ସମାଜସେବୀ ରାଧାମୋହନ ଚଳିତ ନିର୍ବାଚନରେ ପ୍ରତିଦ୍ୱନ୍ଦିତା କରିବା ପାଇଁ ଗତ ୫ବର୍ଷ ଧରି ଏଠାରେ ସାଙ୍ଗଠନିକ କାର୍ଯ୍ୟକ୍ରମ ଜାରି ରଖିଥିଲେ। ବିଜେପିରୁ ଟିକେଟ୍ ନପାଇବାରୁ ସେ ଦଳରୁ ଇସ୍ତଫା ଦେଇ କଂଗ୍ରେସ ଦଳରେ ଯୋଗ ଦେଇଥିଲେ। ତେବେ କଂଗ୍ରେସରୁ ଟିକେଟ୍ ନମିଳିବାରୁ ଶେଷରେ ସେ ଦଳରୁ ଇସ୍ତଫା ଦେବା ସହ ଶନିବାର ସ୍ୱାଧୀନ ଭାବେ ନାମାଙ୍କନପତ୍ର ଦାଖଲ କରିଛନ୍ତି।
ଶନିବାର ସକାଳେ ହାଟଡେଲାଙ୍ଗ ମେଳଣ ପଡିଆ ଠାରୁ ରାଧାମୋହନ ଏକ ବିରାଟ ଶୋଭାଯାତ୍ରାରେ ବାହାରି ବେରବୋଇ ଛକ, ରେଞ୍ଚ ବଜାର, ଅରିଶଲ ବଜାର, ବାଜପୋଇ ଛକ, ଦାନୋଗହିର ଛକ, ହସନପୁର ଛକ, ଜୟପୁର ଛକ ଦେଇ ପିପିଲି ପୌରାଞ୍ଚଳ ପରିକ୍ରମା କରିବା ପରେ ଦାଣ୍ଡମୁକୁନ୍ଦପୁର ବଜାର, ମଙ୍ଗଳପୁର ବଜାର, ତେଇସିପୁର ବଜାର, ସାତଶଙ୍ଖ ବଜାର ଦେଇ ପୁରୀ ଯିବା ସହ ସେଠାରେ ନିଜର ନାମାଙ୍କନପତ୍ର ଦାଖଲ କରିଥିଲେ।
୨ଶହରୁ ଉର୍ଦ୍ଧ ଚାରିଚକିଆ ଯାନ ଓ ୧ହଜାରରୁ ଉର୍ଦ୍ଧ ବାଇକ୍ ଶୋଭାଯାତ୍ରା ମଧ୍ୟରେ ଏକ ଖୋଲା ଜିପ୍ରେ ବରିଷ୍ଠ ନେତା ଦୁର୍ଗାଚରଣ ରାଉତରାୟ, ଶେଷଦେବ ବାରିକ, ପ୍ରମୋଦ କୁମାର ପାତ୍ର ପ୍ରମୁଖଙ୍କ ସହ ରାଧାମୋହନ ଯାଇଥିବା ବେଳେ ବିଭିନ୍ନ ସ୍ଥାନରେ ଶହ ଶହ ସଂଖ୍ୟାରେ ମହିଳା, ପୁରୁଷ ସମର୍ଥକ ଓ ଶୁଭେଚ୍ଛୁମାନେ ତାଙ୍କୁ ଫୁଲତୋଡା ଦେଇ ଶୁଭେଚ୍ଛା ଜଣାଇବା ସହ ବିଜୟ କାମନା କରିଥିଲେ। ଚଳିତ ନିର୍ବାଚନରେ ରାଧାମୋହନ ନିର୍ଣ୍ଣାୟକ ଭୂମିକା ନେବେ ବୋଲି ଏଠାକାର ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
