ଫୁଲବାଣୀ: ୩ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ ହୋଇଛନ୍ତି ଜିଲା ଶ୍ରମ ଅଧିକାରୀ। ୨୦୧୯ରେ ଲାଞ୍ଚ ନେଇ ଭିଜିଲାନ୍ସ ଦ୍ବାରା ଗିରଫ ହୋଇଥିବା ତତ୍କାଳୀନ କନ୍ଧମାଳ ଜିଲା ଶ୍ରମ ଅଧିକାରୀ ରଞ୍ଜନ କିଶୋର ବେହେରାଙ୍କୁ ୩ ବର୍ଷ ସଶ୍ରମ କାରାଦଣ୍ଡ, ୫ ହଜାର ଟଙ୍କା ଜରିମାନା ଏବଂ ଜରିମାନା ଅନାଦେୟ ଅଧିକ ୩ ମାସ ଜେଲ ଦଣ୍ଡରେ ଦଣ୍ଡିତ କରିଛନ୍ତି ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ବିଚାରପତି ସମର ବିଳାଶ ବେହେରା। ରଞ୍ଜନ ବର୍ତ୍ତମାନ ନବରଙ୍ଗପୁର ଜିଲା ଶ୍ରମ ଅଧିକାରୀ ଭାବେ କାର୍ଯ୍ୟରତ।
ସୂଚନା ଅନୁସାରେ, ୨୦୧୯ ମସିହା ନଭେମ୍ବର ୫ ତାରିଖରେ ଟିକାବାଲି ଅଞ୍ଚଳର ୪ଜଣ ହିତାଧିକାରୀଙ୍କର ମୃତ୍ୟୁକାଳୀନ ସହାୟତା ଏବଂ ଅନ୍ୟାନ୍ୟ ସହାୟତା ପାଇଁ ପରିବାର ଆବେଦନ କରିଥିଲେ। ଏହି ସହାୟତା ଯୋଗାଇବା ପାଇଁ ତତ୍କାଳୀନ ଜିଲା ଶ୍ରମ ଅଧିକାରୀ ରଞ୍ଜନ କିଶୋର ବେହେରା ୪ ହିତାଧିକାରୀଙ୍କୁ ୪ ହଜାର ଟଙ୍କା ଲେଖାଏଁ କରି ୧୬ ହଜାର ଟଙ୍କା ଲାଞ୍ଚ ମାଗିଥିଲେ। ଏନେଇ ତତ୍କାଳୀନ ଶ୍ରମିକ ସଂଗଠନ ନେତା ବାବୁଜା ପ୍ରଧାନ ଫୁଲବାଣୀ ଭିଜିଲାନ୍ସରେ ନଭେମ୍ବର ୬ ତାରିଖରେ ଅଭିଯୋଗ କରିଥିଲେ। ଅଭିଯୋଗ ପ୍ରକାରେ ନଭେମ୍ବର ୭ ତାରିଖରେ ବାବୁଜା ପ୍ରଧାନ ଟଙ୍କା ଦେଲା ବେଳେ ପୂର୍ବ ଯୋଜନା ମୁତାବକ ଭିଜିଲାନ୍ସ ରଞ୍ଜନଙ୍କୁ ଧରିଥିଲା। ଏଥିସହ ତାଙ୍କଠାରୁ ଲାଞ୍ଚ ଟଙ୍କା ଜବତ କରିଥିଲା। ପରବର୍ତ୍ତୀ ସମୟରେ ଭିଜିଲାନ୍ସ ତାଙ୍କୁ ଗିରଫ କରିଥିଲା। ଆଜି ସ୍ବତନ୍ତ୍ର ଭିଜିଲାନ୍ସ ବିଚାରପତି ସମର ବିଳାଶ ବେହେରା ମାମଲାର ଶୁଣାଣି କରି ରଞ୍ଜନ କିଶୋର ବେହେରାଙ୍କୁ ୩ ବର୍ଷ ସଶ୍ରମ କାରାଦଣ୍ଡ ସହ ୫ ହଜାର ଟଙ୍କା ଜରିମାନା ଏବଂ ଜରିମାନା ଅନାଦେୟ ଅଧିକ ୩ ମାସ ଜେଲ ଦଣ୍ଡରେ ଦଣ୍ଡିତ କରିଥିବା ଭିଜିଲାନ୍ସ କୋର୍ଟର ସ୍ବତନ୍ତ୍ର ପିପି ଭି.ଭି. ରାମଦାସ ସୂଚନା ଦେଇଛନ୍ତି।
