ବାସୁଦେବପୁର : ସ୍ୱଚ୍ଛ ଭାରତ ମିଶନକୁ ପୁରିଛି ଦଶବର୍ଷ । କେଉଁଠି ଟିକିଏ ସଫେଇରେ ଭାଗନେଇ କ୍ୟାମେରାରେ ନିଜ ଫଟୋକୁ ବିଭିନ୍ନ ସାମାଜିକ ଗଣମାଧ୍ୟମରେ ପୋଷ୍ଟ କରି ନାଁ କମାଇବାକୁ ଶସ୍ତାନିତୀ ଆପଣେଇଛନ୍ତି କେତେକ ଆତ୍ମଘୋଷିତ ସମାଜସେବୀ ଓ ପ୍ରଶାସନିକ ଅଧିକାରୀ । ମାତ୍ର ସ୍ୱଚ୍ଛ ଭାରତ ମିଶନର ପ୍ରକୃତ ଛବି ଦେଖିବାକୁ ମିଳିଛି ରକ୍ତତୀର୍ଥ ଇରମସ୍ଥିତ ସଂଗ୍ରାମୀ ଶହୀଦ ସମାଧୀ ପୀଠରେ ।
ପ୍ରତ୍ୟେକ ବର୍ଷ ସେପ୍ଟେମ୍ବର ଅଠେଇଶ ତାରିଖରେ ବହୁ ଆଡମ୍ବରରେ ଶହୀଦମାନଙ୍କ ଶ୍ରାଦ୍ଧ ଦିବସ ପାଳିତ ହୋଇ ଆସୁଛି । ରାଜ୍ୟର ମାନ୍ୟଗଣ୍ୟ ବ୍ୟକ୍ତି ବିଷେଷ ଏହି ଅବସରରେ ଅତିଥି ଭାବରେ ଯୋଗଦେବା ସହିତ ଶହୀଦ କମିଟି ପକ୍ଷରୁ ଆୟୋଜିତ ଉତ୍ସବରେ ସଂଗ୍ରାମୀ ଶହୀଦମାନଙ୍କ ପରିବାର ଏହି ଠାରେ ପହଞ୍ଚି ଶ୍ରାଦ୍ଧ ଦିବସ ପାଳନ କରିଥାଆନ୍ତି । ତାପରଦିନ ଠାରୁ ସଂଗ୍ରାମୀମାନଙ୍କ ସମାଧୀ ପୀଠ ଯେମିତି ଅବହେଳିତ ଅବସ୍ଥାରେ ପଡିରହିଛି ,ତାହାର ସ୍ପଷ୍ଟଚିତ୍ର ଦେଖିବାକୁ ମିଳିଛି । ସମାଧୀ ପୀଠରେ ଶୁଖିଲା ଫୁଲ, ଶ୍ରାଦ୍ଧ ବର୍ଯ୍ୟବସ୍ତୁରେ ପରିପୁର୍ଣ୍ଣ । ଗାନ୍ଧୀ ଜୟନ୍ତୀରେ ସଂଗ୍ରାମୀମାନଙ୍କ ପ୍ରତିମୂର୍ତ୍ତିରେ ଆଜି ଫୁଲମାଳଟିଏ ପଡିପାରିନି । ଯାହାକୁ ନେଇ ସ୍ଥାନୀୟ କେତେକ ବାସିନ୍ଦା ଆପତ୍ତି ଆଣିଛନ୍ତି । ଇରମ ପଞ୍ଚାୟତର ସରପଞ୍ଚ ସାବିତ୍ରୀ ବଳ କୁହନ୍ତି କି ତୁରନ୍ତ ସଫେଇପାଇଁ ବ୍ୟବସ୍ଥା କରାଯାଉଛି । ଏନେଇ ବିଡିଓ ସଞ୍ଜୀବ କୁମାର ସାହୁ କୁହନ୍ତି କି ଜାଣିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଇ ସଫେଇ କରାଯିବାର ବ୍ୟବସ୍ଥା କରାଯାଇଛି ।
Comments are closed.