ପାଟଣା : ସରକାରଙ୍କ ପକ୍ଷରୁ ଗରୀବ ପଡିକାର୍ଡ ଧାରୀଙ୍କୁ ଚାଉଳ ଓ ସ୍ଵତନ୍ତ୍ର ସହାୟତା ଦିଆଯାଇଥିବା ବେଳେ ଅସହାୟ ଓ ବାହାରୁ ଆସି ଢେଙ୍କିକୋଟ ପଞ୍ଚାୟତ ଅଞ୍ଚଳରେ ରହୁଥିବା ମୁର୍ଶିଦାବାଦ ଅଞ୍ଚଳର ୪୦ରୁ ଉର୍ଦ୍ଧ୍ବ ରାଜମିସ୍ତ୍ରୀ ଓ ସେମାନଙ୍କ ସହାୟକମାନଙ୍କୁ ଦୁଇ ଓଳା ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ଏହା ଛଡା ଢେଙ୍କିକୋଟ ପଞ୍ଚାୟତରେ ଥିବା ଓଡ଼ିଶା ଆଦର୍ଶ ବିଦ୍ୟାଳୟ ସଙ୍ଗରୋଧ କେନ୍ଦ୍ରରେ ୨୨ ଜଣ ଉତ୍ତର ପ୍ରଦେଶ ବାସିନ୍ଦା ଶ୍ରମଜୀଵୀମାନଙ୍କୁ ରଖାଯାଇଥିବା ବେଳେ ସେମାନଙ୍କ ସହ ଜଣେ ଗଞ୍ଜାମ ଜିଲ୍ଲା ବାସିନ୍ଦାଙ୍କୁ ମଧ୍ୟ ଖାଦ୍ୟ ପେୟ ବ୍ୟବସ୍ଥା କରିଛି ଢେଙ୍କିକୋଟ ପଞ୍ଚାୟତ। ଏହାଛଡା ଯେଉଁ ଅସହାୟ ଗରୀବ ସରକାରୀ ଯୋଜନାର ଲାଭ ଉଠାଇବାକୁ ଘରୁ ବାହାରିବା ସମ୍ଭବ ନୁହେଁ ସେମାନଙ୍କ ଘରକୁ ଘର ଯାଇ ଢେଙ୍କିକୋଟ ସରପଞ୍ଚ ଗୌରୀ ବାରିକ ସେମାନଙ୍କ ଭଲମନ୍ଦ ବୁଝିବା ସହ ନିଜ ଅର୍ଥରେ ବିସ୍କୁଟ, ଚା, ଚିନି ଦେଉଥିବା ଦେଖାଯାଇଛି। ଢେଙ୍କିକୋଟ ପଞ୍ଚାୟତ ଅଞ୍ଚଳକୁ ବାହାର ରାଜ୍ୟ ଅଥବା ଜିଲ୍ଲାରୁ ଆସୁଥିବା ଲୋକଙ୍କ ଉପରେ ନଜର ରଖିବା ପାଇଁ ବ୍ୟବସ୍ଥା କରାଯାଇଥିବା ବେଳେ ବଜାର ଓ ହାଟ ଅଞ୍ଚଳରେ, ବ୍ୟାଙ୍କ ନିକଟରେ, ପଞ୍ଚାୟତ ନିକଟକୁ ଆସୁଥିବା ଲୋକେ ସାମାଜିକ ଦୁରତା ରଖି ନିଜ କାମ କରିବାକୁ ବ୍ୟାପକ ପଦକ୍ଷେପ ନେଇ ଉଦାହରଣ ସୃଷ୍ଟି କରିଥିବ ଦେଖାଯାଇଛି ।
Comments are closed.