ମସ୍କୋ: ଶୀତଦିନେ ଥଣ୍ଡା ହୁଏ । ଚଳିତ ବର୍ଷ ମଧ୍ୟ କିଛିଟା ଥଣ୍ଡା ଆମ ଦେଶରେ ପଡ଼ିଲାଣି । ଦିଲ୍ଲୀରେ ତାପମାତ୍ରା ୩ ଡ଼ିଗ୍ରୀକୁ ଖସିଛି । ଫୁଲବାଣୀରେ ତାପମାତ୍ରା ଶୀତଦିନେ ୩ ଡ଼ିଗ୍ରୀରୁ ୫ ଡ଼ିଗ୍ରୀକୁ ଖସିଆସେ । ସୁନ୍ଦରଗଡ଼ ଓ କେନ୍ଦୁଝରର କିଛି ସ୍ଥାନରେ ତାପମାତ୍ରା ଶୂନରେ ପହଞ୍ଚେ । ମାତ୍ର ବିଶ୍ବର ଏମିତି ଏକ ଗାଁ ଅଛି, ଯେଉଁଠି ଶୀତଦିନେ ତାପମାତ୍ରା ବିଯୁକ୍ତ ୭୧ ଡ଼ିଗ୍ରୀରେ ପହଞ୍ଚି ଯାଇଥାଏ । ଏହି ଗାଁଟି ରୁଷର ଉତ୍ତରାଞ୍ଚଳର ସାଇବେରିଆ ଅଞ୍ଚଳରେ ଅବସ୍ଥିତ । ଗାଁର ନାଁ ହେଉଛି ଓମିଓକୋନ୍ ।
ଓମିଓକୋନ୍ ସାଇବେରିଆର ଏକ ଗାଁ । ଯେଉଁଠି ଶୀତଦିନେ ଦୁବ ବି କଅଁଳେ ନାହିଁ । ଚାରିଆଡ଼େ ବରଫ ଆଉ ବରଫ । ଆଉ ଏହି ସମୟରେ ଲୋକମାନେ କେବଳ ମାଂସ ଖାଇ ବଞ୍ଚିଥାଆନ୍ତି ।
ଶୀତଦିନେ ହାରାହାରି ତାପମାତ୍ରା ବିଯୁକ୍ତ ୫୦ ଡ଼ିଗ୍ରୀରେ ପହଞ୍ଚି ଯାଇଥାଏ । ତଥାପି ଏଠାରେ ସ୍କୁଲ ଖୋଲା ରହେ । ଚଳିତ ବର୍ଷ ଶୀତ ଅଧିକ ହେବାରୁ ବିଦ୍ୟାଳୟଗୁଡ଼ିକୁ ବନ୍ଦ ରଖାଯାଇଛି । ଶୀତରୁ ରକ୍ଷା ପାଇବା ପାଇଁ ବିଯୁକ୍ତ ୫୬ ଡ଼ିଗ୍ରୀ ତାପମାତ୍ରାରେ ଲୋକମାନଙ୍କୁ ରଖିବାକୁ ସରକାର ବ୍ୟବସ୍ଥା କରିଛନ୍ତି ।
ଡ଼ିସେମ୍ବର ମାସରେ ଓମିଆକୋନ ଗାଁରେ ସୂର୍ଯ୍ୟ ପ୍ରାୟ ଦିନ ୧୦ଟା ବେଳକୁ ଉଠିଥାଆନ୍ତି । ୧୯୨୪ ମସିହାରେ ଏହି ସ୍ଥାନର ତାପମାତ୍ରା ବିଯୁକ୍ତ ୭୧.୨ ଡ଼ିଗ୍ରୀ ରେକର୍ଡ଼ କରାଯାଇଥିଲା । ଆଣ୍ଟାର୍କଟିକା ବାହାରେ ଏହି ଗାଁ ଦୁନିଆର ସବୁଠାରୁ ଶୀତଳ ସ୍ଥାନ ଭାବରେ ପରିଗଣିତ ହୋଇଥାଏ । ୨୦୧୮ ଜନଗଣନା ଅନୁସାରେ ଏଠାରେ ପ୍ରାୟ ୯୦୦ ଲୋକ ବାସ କରିଥାଆନ୍ତି ଏବଂ ସେମାନଙ୍କ ଉପରେ ସବୁବେଳେ ଥଣ୍ଡା ଓ ବରଫ ବିପଦ ହୋଇ ଉଭା ହୋଇଥାଏ ।
ଏହି ଗାଁର ଲୋକମାନେ ନିଜ ଗାଡ଼ି ମୋଟର ଷ୍ଟାର୍ଟ କେବେ ବନ୍ଦ କରନ୍ତି ନାହିଁ । କାରଣ ଥରେ ଗାଡ଼ି ଷ୍ଟାର୍ଟ ବନ୍ଦ ହୋଇଗଲେ ଆଉ ଗାଡ଼ି ଷ୍ଟାର୍ଟ ହେବା ସମ୍ଭାବନା କମ୍ ।
ଏଠାକାର ଲୋକମାନେ ବିଭିନ୍ନ ପ୍ରକାର ମାଂସ ଖାଇଥାଆନ୍ତି । କେବଳ ଘୋଡ଼ା, ବରଫ ହରିଣ ମାଂସ ସେମାନଙ୍କର ଅତ୍ୟନ୍ତ ପ୍ରିୟ । ଏହାବ୍ୟତୀତ ଷ୍ଟ୍ରୋଗାନିନା ମାଛ ମଧ୍ୟ ସେଠାରେ ବେଶ୍ ଲୋକପ୍ରିୟ ଖାଦ୍ୟ । ଏଥିରେ ପ୍ରଚୁର ପରିମାଣରେ ପୁଷ୍ଟିକର ଉପାଦାନ ଓ ଚର୍ବି ରହିଥାଏ ।
ଜୁନ ଓ ଜୁଲାଇରେ ଯେତେବେଳେ ପୃଥିବୀର ଅନେକ ସ୍ଥାନରେ ପ୍ରବଳ ଉତ୍ତାପ ହୁଏ ଓ ତାପମାତ୍ରା ୫୦ ଡ଼ିଗ୍ରୀ ସେଲସିଅସ ପର୍ଯ୍ୟନ୍ତ ପହଞ୍ଚି ଯାଏ ସେତେବେଳେ ଏହି ଅଞ୍ଚଳରେ ତାପମାତ୍ରା ବିଯୁକ୍ତ ୨୦ ଡ଼ିଗ୍ରୀ ରହିଥାଏ ।
