ଜାମ୍ମୁ ଓ କାଶ୍ମୀର ସରକାରୀ ଭାଷା ବିଲ୍ ୨୦୨୦ ରାଜ୍ୟସଭାରେ ଅନୁମୋଦନ ହେବା ସହ ଏହା ସଂସଦର ଅନୁମୋଦନ ଲାଭ କରିଛି। ଏହି ବିଲ୍ ଅନୁସାରେ କାଶ୍ମିରୀ, ଡୋଗ୍ରୀ, ହିନ୍ଦୀ, ଇଙ୍ଗ୍ଲିସ୍ ଏବଂ ଉର୍ଦ୍ଦୁ ଜାମ୍ମୁ ଓ କାଶ୍ମୀର କେନ୍ଦ୍ରଶାସିତ ଅଞ୍ଚଳର ସରକାରୀ ଭାଷା ହେବ। ଏ ସଂକ୍ରାନ୍ତ ବିତର୍କରେ ଅଂଶଗ୍ରହଣ କରି ସ୍ୱରାଷ୍ଟ୍ର ବିଭାଗ ରାଷ୍ଟ୍ରମନ୍ତ୍ରୀ ଜି. କିଶନ୍ ରେଡ୍ଡୀ କହିଛନ୍ତି, ଏହି ଆଇନ୍ ଜାମ୍ମୁ ଓ କାଶ୍ମୀର ଜନସାଧାରଣଙ୍କର ଦୀର୍ଘ ଦିନର ଦାବି ପୂରଣ କରିଛି। ସେ କହିଛନ୍ତି, ଜାମ୍ମୁ ଓ କାଶ୍ମୀର କେନ୍ଦ୍ରଶାସିତ ଅଞ୍ଚଳର ଲୋକମାନେ ସେମାନେ କହୁଥିବା ଓ ବୁଝୁଥିବା ଭାଷାକୁ ସରକାରୀ ଭାଷା କରାଯିବା ଲାଗି ଦାବି କରୁଥିବା ବିଷୟରେ ଉପରାଜ୍ୟପାଳ କେନ୍ଦ୍ର ସରକାରଙ୍କୁ ଜଣାଇଥିଲେ।
ସେ କହିଛନ୍ତି, ଏହି ବିଲ୍ ଦ୍ୱାରା ଦୀର୍ଘ ୭୦ବର୍ଷର ତ୍ରୁଟିକୁ ସଂଶୋଧନ କରାଯାଇଛି ଏବଂ ଜାମ୍ମୁ ଓ କାଶ୍ମୀରର ଜନସାଧାରଣଙ୍କ କଥିତ ଭାଷାକୁ ସେମାନଙ୍କର ସରକାରୀ ଭାଷା ଭାବେ ମାନ୍ୟତା ଦିଆଯାଇଛି। ମନ୍ତ୍ରୀ କହିଛନ୍ତି, ଜାମ୍ମୁ ଓ କାଶ୍ମୀରରେ ପଞ୍ଜାବୀ ଓ ଅନ୍ୟାନ୍ୟ ଆଞ୍ଚଳିକ ଭାଷାଗୁଡ଼ିକର ବିକାଶ ଦିଗରେ ସରକାର କାର୍ଯ୍ୟ କରିବେ।
