ଆଠଗଡ : ଆଠଗଡ ବୁଦ୍ଧିଜୀବୀ ବରିଷ୍ଠ ନାଗରିକ ସଂଘ ପରିସରରେ ଓଡିଶା ରାଜ୍ୟ ସରକାରଙ୍କ ଅବଦାନ ଯୋଜନା ସହାୟତାରେ ଏକ ଯୋଗ ଓ ପ୍ରାଣାୟାମ ସଚେତନତା କାର୍ଯ୍ୟକ୍ରମ ମଙ୍ଗଳବାର ଅନୁଷ୍ଠିତ ହୋଇଯାଇଛି । ସଙ୍ଘର ସଭାପତି ଇଂ ଶିବ ପ୍ରସାଦ ପଣ୍ଡାଙ୍କ ପୌରାହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସ୍ଥାନୀୟ ଯୋଗକେନ୍ଦ୍ରର ସଭାପତି ଯୋଗଗୁରୁ ଡାକ୍ତର ଗୋକୁଳାନନ୍ଦ ପତ୍ରୀ ଯୋଗଦେଇ ଯୋଗର ଓ ପ୍ରାଣାୟାମ ମୂଳତତ୍ତ୍ବ ଏବଂ ଏହାର ଉପକାରିତା ଉପରେ ବିସ୍ତୃତ ଆଲୋକପାତ କରିଥିଲେ । ଏଥି ସହିତ ଯୋଗର ପ୍ରକାର ଭେଦ ଏବଂ ନିୟମିତ ଯୋଗର ଆବଶ୍ୟକତା ସମ୍ପର୍କରେ ବୁଝାଇଥିଲେ । ଉକ୍ତ କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଯୋଗ ବିଶାରଦ ପ୍ରଫୁଲ୍ଲ କୁମାର ପଟ୍ଟନାୟକ ଯୋଗର ବିଭିନ୍ନ ଦିଗ ଓ ଅଷ୍ଟାଙ୍ଗ ଯୋଗ ସମ୍ୱନ୍ଧରେ ଆଲୋଚନା କରିଥିଲେ । ଯୋଗ ପ୍ରଶିକ୍ଷିକା ନଳିନୀ ପଣ୍ଡା ଯୋଗ ସମ୍ପର୍କରେ ନିଜର ଅଭିମତ ରଖିଥିଲେ । ସଂଘର ସଭ୍ୟା ପୁଲିନ ମିଶ୍ର କାର୍ଯ୍ୟକ୍ରମ ଉପରେ ତାଙ୍କର ସଂକ୍ଷିପ୍ତ ବକ୍ତବ୍ୟ ରଖିଥିଲେ । ବହୁ ସଂଖ୍ୟାରେ ବରିଷ୍ଠ ନାଗରିକ ଏହି କାର୍ଯ୍ୟକ୍ରମରେ ଉପସ୍ଥିତ ରହି ଯୋଗ ଓ ପ୍ରାଣାୟାମ ଉପରେ ଅନେକ କିଛି ଶିକ୍ଷା ଲାଭ କରିପାରିଥିଲେ । କାର୍ଯ୍ୟକ୍ରମକୁ ସଙ୍ଘର ସମ୍ପାଦକ ଗିରୀଶ କୁମାର ମିଶ୍ର ପରିଚାଳନା କରିବା ସହିତ ଶେଷରେ ଧନ୍ୟବାଦ ଅର୍ପଣ କରିଥିଲେ । ସୁରେଶ କୁମାର ବେଉରା, ବିଜୟ କୁମାର ପ୍ରଧାନ, ଇଂ ଉମେଶ ଚନ୍ଦ୍ର ସାହୁ, ପ୍ରମୋଦ କୁମାର ସାହୁ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।
Popular Categories
Previous article
Next article