ଭୁବନେଶ୍ବର: ନର୍ସିଂ ଅଧିକାରୀଙ୍କ ୬ ବର୍ଷ ଚୁକ୍ତିଭିତ୍ତିକ ଅବଧିକୁ ମୂଳ ଚାକିରି ଅବଧିରେ ମିଶାଇ ପଦୋନ୍ନତି ଏବଂ ସମସ୍ତ ଆର୍ଥିକ ସୁବିଧା ପ୍ରଦାନ, ଯୋଗ୍ୟ ନର୍ସିଂ ଅଧିକାରୀଙ୍କୁ ବରିଷ୍ଠତା ଭିତ୍ତିରେ ପଦୋନ୍ନତି ଆଦି ୧୦ ଦଫା ଦାବି ନେଇ ରାସ୍ତାକୁ ଓହ୍ଲାଇଛି ଓଡ଼ିଶା ନର୍ସିଂ କର୍ମଚାରୀ ସଂଘ।
ସଂଘର ସଭାନେତ୍ରୀ ଶୁଚିସ୍ମିତା ଦାଶଙ୍କ ନେତୃତ୍ବରେ ୫ ହଜାରରୁ ଅଧିକ ନର୍ସିଂ ଅଧିକାରୀ ମାଷ୍ଟର କ୍ୟାଣ୍ଟିନ ଛକରୁ ଏକ ବିଶାଳ ଶୋଭାଯାତ୍ରାରେ ବାହାରି ଲୋୟର ପିଏମ୍ଜି ଛକରେ ଏକାଠି ହୋଇଥିଲେ। ସେବା କାର୍ଯ୍ୟ ଜାରି ରଖି ବିକ୍ଷୋଭ ପ୍ରଦର୍ଶନ ସହିତ ଧାରଣା ଦେଇଥିଲେ। ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରଖିବା ସହିତ ପର୍ଯ୍ୟାୟକ୍ରମେ କାର୍ଯ୍ୟବନ୍ଦ ଆନ୍ଦୋଳନ ପାଇଁ ସଂଘ ନିଷ୍ପତ୍ତି ନେଇଥିଲା।
ଅପରାହ୍ଣରେ ସଂଘ ପକ୍ଷରୁ ୪ ଜଣିଆ ପ୍ରତିନିଧି ଦଳ ବିଧାନସଭାରେ ସ୍ବାସ୍ଥ୍ୟମନ୍ତ୍ରୀ ଡା. ମୁକେଶ ମହାଲିଙ୍ଗଙ୍କ ସହିତ ଆଲୋଚନା କରିଥିଲେ। ସମାଧାନ ଦିଗରେ ମନ୍ତ୍ରୀ ଦୁଇମାସ ସମୟ ମାଗିଥିଲେ ଏବଂ ଆନ୍ଦୋଳନ ସ୍ଥଗିତ ରଖିବା ପାଇଁ କହିଥିଲେ। ଏ ସମ୍ପର୍କରେ ସଂଘ ପକ୍ଷରୁ ବୈଠକ କରାଯାଇ ଆସନ୍ତକାଲି ନିଷ୍ପତ୍ତି ନିଆଯିବ ବୋଲି ସାଧାରଣ ସମ୍ପାଦକ ଅଶ୍ବିନୀ କୁମାର ଦାସ କହିଛନ୍ତି।
