ଏନ୍‌ଡିଏ କୌଣସି ଦଳର ସମ୍ପତ୍ତି ନୁହେଁ : ସଞ୍ଜୟ

ନୂଆଦିଲ୍ଲୀ : ସଂସଦରେ ଶିବସେନାର ଆସନ ପରିବର୍ତ୍ତନ ପରିପ୍ରେକ୍ଷୀରେ ଶିବସେନା ସାଂସଦ ସଞ୍ଜୟ ରାଉତ ବିଜେପିକୁ ଆକ୍ଷେପ କରି କହିଛନ୍ତି ଯେ ଏନ୍‌ଡିଏ କୌଣସି ନିର୍ଦ୍ଦିଷ୍ଟ ଦଳର ଏକକ ସମ୍ପତ୍ତି ନୁହେଁ; କିନ୍ତୁ କେହି କେହି ନିଜକୁ ଭଗବାନ ବୋଲି ଭାବୁଛନ୍ତି। ଶିବସେନା ଏନ୍‌ଡିଏର ୪ ପ୍ରତିଷ୍ଠାତା ଦଳ ମଧ୍ୟରୁ ଗୋଟିଏ। ବାଲାସାହେବ ଠାକ୍‌ରେ ଏନ୍‌ଡିଏର ଅନ୍ୟତମ ପ୍ରତିଷ୍ଠାତା। ଶିବସେନା ବହୁ ବିପଦ ସମୟରେ ଏନ୍‌ଡିଏକୁ ରକ୍ଷା କରିଛି; କିନ୍ତୁ ଏବେ ସେମାନେ ନିଜକୁ ଭଗବାନ ବୋଲି ଭାବୁଛନ୍ତି। ଗଣତନ୍ତ୍ରରେ କେହି ନିଜକୁ ଭଗବାନ ଭାବିବା ଅନୁଚିତ। ଶିବସେନାକୁ ଏନ୍‌ଡିଏରୁ ବାହାର କରିବା ପୂର୍ବରୁ ବିଜେପି ପ୍ରକାଶ ସିଂହ ବାଦଲ ଓ ନୀତୀଶ କୁମାରଙ୍କ ସହ ଆଲୋଚନା କରିଛି କି ବୋଲି ସେ ପ୍ରଶ୍ନ କରିଛନ୍ତି। ବିଜେପିର ଅହଂକାର ପାଇଁ ମହାରାଷ୍ଟ୍ରରେ ରାଜନୈତିକ ସଂକଟ ସୃଷ୍ଟି ହୋଇଛି ବୋଲି ସଞ୍ଜୟ ଆକ୍ଷେପ କରିଛନ୍ତି।