ଅନ୍‌ଲାଇନ୍‌ରେ ନନ୍ଦନକାନନ ପଶୁପକ୍ଷୀଙ୍କୁ ପୋଷ୍ୟ ଭାବେ ଗ୍ରହଣ କରିପାରିବେ ପଶୁପ୍ରେମୀ

ନନ୍ଦନକାନନ : ଏଣିକି ନନ୍ଦନକାନନ ପ୍ରାଣୀ ଉଦ୍ୟାନର ପଶୁପକ୍ଷୀଙ୍କୁ ଘରେ ବସି ଅନ୍‌ଲାଇନ୍‌ରେ ପୋଷ୍ୟ ଭାବେ ଗ୍ରହଣ କରିପାରିବେ ପଶୁପ୍ରେମୀ। ଏଥିପାଇଁ ସ୍ବତନ୍ତ୍ର ୱେବ୍‌ସାଇଟ୍‌ ବ୍ୟବସ୍ଥା ହୋଇଛି। ଅନ୍‌ଲାଇନ୍‌ ଜରିଆରେ ଜଣେ ବ୍ୟକ୍ତି ସର୍ବନିମ୍ନ ୫୦୦ଟଙ୍କା ଦେଇ ପଶୁପକ୍ଷୀଙ୍କୁ ପୋଷ୍ୟ ଭାବେ ଗ୍ରହଣ କରିପାରିବେ ବୋଲି ଗଣମାଧ୍ୟମକୁ କହିଛନ୍ତି ନନ୍ଦନକାନନ ନିର୍ଦେଶକ ଶଶିପଲ। ଏହି ପରିପ୍ରେକ୍ଷୀରେ ସୋମବାର ହାଇଦରାବାଦର ସ୍ବପ୍ନଜିତ୍‌ ପଟ୍ଟନାୟକ ନନ୍ଦନକାନନର ହିମାଳୟ କଳା ଭାଲୁକୁ ପୋଷ୍ୟ ଭାବେ ଗ୍ରହଣ କରିଛନ୍ତି ବୋଲି ନିର୍ଦେଶକ କହିଛନ୍ତି। କରୋନା ମହାମାରୀ ପରିପ୍ରେକ୍ଷୀରେ ବିଗତ ୭ମାସ ମଧ୍ୟରେ ପ୍ରାଣୀ ଉଦ୍ୟାନର ୧୭୦ରୁ ୧୭୫ପଶୁପକ୍ଷୀଙ୍କୁ ପୋଷ୍ୟ ଭାବେ ଗ୍ରହଣ କରୁଛନ୍ତି ପଶୁପକ୍ଷୀ ପ୍ରେମୀ। ଏ ବାବଦରେ କର୍ତ୍ତୃପକ୍ଷ ହାରାହାରି ୨୩ଲକ୍ଷ ଟଙ୍କା ଆୟ କରିଛନ୍ତି। ଏହି ପୋଷ୍ୟ ଗ୍ରହଣ ପ୍ରକ୍ରିୟାରେ ୬୦ପ୍ରତିଶତ ଓଡ଼ିଶାବାସୀ ସାମିଲ ହୋଇଥିବା ବେଳେ ହରିୟାଣା, ରାଜସ୍ଥାନ, ଦିଲ୍ଲୀ ଓ ମହାରାଷ୍ଟ୍ର ଆଦି ୧୨ଟି ରାଜ୍ୟରୁ ମଧ୍ୟ ଆଶାନୁରୂପ ଭାବେ ପଶୁପକ୍ଷୀଙ୍କୁ ପୋଷ୍ୟ ଭାବେ ଗ୍ରହଣ କରିବାକୁ ଅଧିକ ଆଗ୍ରହ ପ୍ରକାଶ କରୁଛନ୍ତି। ଏହି ବ୍ୟବସ୍ଥା ପ୍ରାଣୀ ଉଦ୍ୟାନରେ ୨୦୧୮ରୁ ଆରମ୍ଭ କରାଯାଇଥିଲା।