କେଉଁ ପ୍ରାନ୍ତରେ ଜନସଂଖ୍ୟା ବଢ଼ିଚାଲିଥିବାବେଳେ ଅନ୍ୟ କେଉଁଠି ଜନବିରଳ ସମସ୍ୟା। ପାଶ୍ଚାତ୍ୟ ରାଷ୍ଟ୍ର ଇଉରୋପ, ଆମେରିକାରେ ଲୋକସଂଖ୍ୟା ସେଭଳି ଅଧିକ ନୁହେଁ। ସେଠା ଗାଁଗଣ୍ଡାରେ କ୍ରମଶଃ ଜନସଂଖ୍ୟା କମ୍ ହେଉଥିବାର ସର୍ବେକ୍ଷଣରୁ ଜଣାପଡ଼ିଛି। ସେଇ ସମାନ ସମସ୍ୟାର ସମ୍ମୁଖୀନ ଏବେ ଇଟାଲୀର ଏକ ଗ୍ରାମ ସାଣ୍ଟୋ ଷ୍ଟିଫାନୋ ଡି ସେନାନିଓ। ଗାଁରେ ପ୍ରତିବର୍ଷ ପର୍ଯ୍ୟଟକ ଆସୁଥିବାବେଳେ ଜନସଂଖ୍ୟା ଏବେ ମୋଟ୍ ୧୧୫ ଜଣ। ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଏହି ଗାଁରେ ରହିବାକୁ ଲୋକେ ଆଉ ଚାହୁଁନାହାନ୍ତି। ସହରର ଚାକଚକ୍ୟରେ ଯୁବପିଢ଼ି ରହୁଥିବାବେଳେ ଗାଁରେ ଅଧିକାଂଶ ବୟସ୍କ ଲୋକେ ହିଁ ରହୁଛନ୍ତି।
ସ୍ଥାନୀୟ ମେୟର ଯୁବବର୍ଗଙ୍କ ସହର ଅଭିଯାନ ଦେଖି ଚିନ୍ତାରେ। ଏବେଠାରୁ ସେ ପଦକ୍ଷେପ ନ ନେଲେ ଆଗାମୀ ଦିନରେ ଗ୍ରାମ ଜନଶୂନ୍ୟ ହେବାର ଭୟ ଦେଖାଗଲାଣି। ମେୟର ଏବେ ଘୋଷଣା କରିଛନ୍ତି ଇଟାଲୀର ଅନ୍ୟ ପ୍ରାନ୍ତରେ ରହୁଥିବା ନାଗରିକ ଏଇ ଗ୍ରାମରେ ରହିପାରିବେ। ତା’ ସହ ସେଠା ପ୍ରଶାସନ ସେମାନଙ୍କୁ ୩୮ଲକ୍ଷ ଟଙ୍କା ଦେବ। ଗ୍ରାମରେ ଆସି ରହିବା ପରେ ସେହି ବ୍ୟକ୍ତିକୁ କୌଣସି ବ୍ୟବସାୟ କରିବାର ସୁବିଧା ମିଳିବ। ୪୦ ବର୍ଷରୁ କମ୍ ବୟସର ଲୋକ ହିଁ ଆବେଦନ କରିପାରିବେ। ନଭେମ୍ବର ୧୫ ପର୍ଯ୍ୟନ୍ତ ଆବେଦନର ସୁବିଧା ଥିବାବେଳେ ବର୍ତ୍ତମାନ ସୁଦ୍ଧା ୧,୫୦୦ ଲୋକ ଇଚ୍ଛୁକ ପ୍ରାର୍ଥୀ ବୋଲି ଜଣାପଡ଼ିଛି।
