ଜୋହାନ୍ସବର୍ଗ : ମହାତ୍ମା ଗାନ୍ଧୀଙ୍କ ଦକ୍ଷିଣ ଆଫ୍ରିକାର ଅଣନାତି ସତୀଶ ଧୂପେଲିଆଙ୍କର ରବିବାର ଦିନ ପରଲୋକ ହୋଇ ଯାଇଛି। ତିନି ଦିନ ତଳେ ସେ ନିଜର ୬୬ ତମ ଜନ୍ମଦିବସ ପାଳନ କରିଥିଲେ। ସେ କରୋନ ସଂକ୍ରମଣର ଶିକାର ହୋଇଥିଲେ ବୋଲି ପରିବାର ସଦସ୍ୟ କହିଛନ୍ତି।
ଧୂପେଲିଆଙ୍କ ଭଉଣୀ ଉମା ଧୂପେଲିଆ-ମିସ୍ତ୍ରୀ ନିଶ୍ଚିତ କରିଛନ୍ତି ଯେ ନିମୋନିଆ କାରଣରୁ ସେ ଏକ ମାସ ହେବ ଚିକିତ୍ସିତ ହେଉଥିଲେ। ତେବେ ପରେ ସେ କରୋନା ଆକ୍ରାନ୍ତ ହୋଇଥିଲେ, କରୋନା ସମ୍ବନ୍ଧୀୟ ଜଟିଳତାର ଚିକିତ୍ସା ଚାଲିଥିଲା। ରବିବାର ସନ୍ଧ୍ୟାରେ ସେ ହୃଦଘାତରେ ଆକ୍ରାନ୍ତ ହୋଇଥିଲେ ବୋଲି ଉମା ସୋସିଆଲ ମିଡିଆରେ କହିଛନ୍ତି।
ଶ୍ରୀମତୀ ଉମାଙ୍କ ବ୍ୟତୀତ ଜୋହାନ୍ସବର୍ଗରେ ଅନ୍ୟ ଜଣେ ଭଉଣୀ କିର୍ତ୍ତୀ ମେନନ ଅଛନ୍ତି, ସେ ଗାନ୍ଧିଜୀଙ୍କ ସ୍ମୃତି ସମ୍ବନ୍ଧୀୟ ବିଭିନ୍ନ ପ୍ରକଳ୍ପରେ ସକ୍ରିୟ ଅଛନ୍ତି।
ଏହି ତିନି ଭାଇଭଉଣୀ ମଣିଲାଲ ଗାନ୍ଧୀଙ୍କ ବଂଶଧର, ମହାତ୍ମା ଗାନ୍ଧୀ ଦକ୍ଷିଣ ଆଫ୍ରିକାରେ ଦୁଇ ଦଶନ୍ଧି ବିତାଇ ଭାରତକୁ ଫେରିବା ପରେ ନିଜର କାର୍ଯ୍ୟ ଜାରି ରଖିବା ପାଇଁ ଦକ୍ଷିଣ ଆଫ୍ରିକାରେ ମଣିଲାଲଙ୍କୁ ଛାଡି ଆସିଥିଲେ।
ଜୀବନର ଅଧିକାଂଶ ସମୟ ଗଣମାଧ୍ୟମରେ ବିତାଇଥିବା ଥିବା ଶ୍ରୀ ଧୂପେଲିଆ, ବିଶେଷକରି ଭିଡିଓଗ୍ରାଫର ତଥା ଫଟୋଗ୍ରାଫର ଭାବରେ ମଧ୍ୟ ଡର୍ବାନ ନିକଟସ୍ଥ ଫିନିକ୍ସ ସେଟେଲମେଣ୍ଟରେ ମହାତ୍ମା ଗାନ୍ଧୀଙ୍କ ଦ୍ୱାରା ଆରମ୍ଭ ହୋଇଥିବା କାର୍ଯ୍ୟକୁ ଜାରି ରଖିବା ପାଇଁ ଗାନ୍ଧୀ ବିକାଶ ଟ୍ରଷ୍ଟକୁ ସାହାଯ୍ୟ କରିବାରେ ଅତ୍ୟନ୍ତ ସକ୍ରିୟ ଥିଲେ। ସେ ସମସ୍ତ ଅଭାବୀ ଲୋକଙ୍କୁ ସାହାଯ୍ୟ କରିବା ପାଇଁ ପ୍ରସିଦ୍ଧ ଥିଲେ ଏବଂ ଅନେକ ସାମାଜିକ କଲ୍ୟାଣ ସଂଗଠନରେ ସକ୍ରିୟ ଥିଲେ।
