ବାତ୍ୟାର ରୂପ ନେଲା ଲଘୁଚାପ – ଅମିତ ଶାହଙ୍କ ନେତୃତ୍ୱରେ ବାତ୍ୟା ‘ବିପର୍ଯ୍ୟୟ’କୁ ନେଇ ପରିଚାଳନା ବୈଠକ

ନୂଆଦିଲ୍ଲୀ – ଆରବ ସାଗରରେ ସୃଷ୍ଟ ଲଘୁଚାପ ବାତ୍ୟାର ରୂପ ଧାରଣ କରିଛି । ଏହାର ନାମ ବିପର୍ଯ୍ୟୟ ରଖାଯାଇଛି ।ଏବେ ଏହା ପୂର୍ବ ଏବଂ ମଧ୍ୟ ଦକ୍ଷିଣ ପୂର୍ବ ଆରବ ସାଗରରେ କେନ୍ଦ୍ରୀଭୂତ ରହିଛି । ଏହା କିଛି ସମୟ ମଧ୍ୟରେ ଭୀଷଣ ବାତ୍ୟାରେ ପରିଣତ ହେବ । ସମୁଦ୍ର ମଧ୍ୟରେ ୧୩୫ କିଲୋମିଟରରୁ ୧୪୫ କିଲୋମିଟର ମଧ୍ୟରେ ପବନ ବହିବାର ସମ୍ଭାବନା ରହିଛି । କେନ୍ଦ୍ର ଗୃହମନ୍ତ୍ରୀ ଅମିତଶାହା ବାତ୍ୟା ମୁକାବିଲା ନେଇ ଗୁଜୁରାଟର ମନ୍ତ୍ରୀ ଏବଂ ସରକାରୀ ଅଧିକାରୀଙ୍କ ସହ ଆଲୋଚନା କରିଛନ୍ତି ।

ଏହି ସମୟ ମଧ୍ୟରେ ସମୁଦ୍ରମଧ୍ୟକୁ ମତ୍ସଜୀବୀମାନେ ନଯିବା ପାଇଁ ଚେତାବନୀ ଜାରି କରାଯାଇଛି । ଭାରତର ଦକ୍ଷିଣ ପଶ୍ଚିମ ଦିଗରେ ଥିବା ରାଜ୍ୟମାନଙ୍କରେ ଆସନ୍ତା ୫ ଦିନ ପାଇଁ ପାଗ କୋହଲା ରହିବା ସହ ଜୋରରେ ପବନ ବହିବାର ସମ୍ଭାବନା ରହିଛି । ଗୁଜୁରାଟର କଚ୍ଛ ଜଖଉ ବନ୍ଦର ଅଞ୍ଚଳରେ ବାତ୍ୟା ବିପର୍ଯ୍ୟୟ ସ୍ଥଳଭାଗ ସ୍ପର୍ଶ କରିପାରେ । ଏଥିପାଇଁ କଚ୍ଛର ସମୁଦ୍ରକୂଳିଆ ଅଞ୍ଚଳରୁ ୩୦ ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି ।

ଗୁଜୁରାଟରେ ଏନ୍‌ଡିଆର୍‌ଏଫ୍‌ ଏବଂ ଏସ୍‌ଡିଆର୍‌ଏଫ୍‌ର ଯବାନମାନଙ୍କୁ ମୁତୟନ କରାଯାଇଛି । ଏହି ବାତ୍ୟା ଯୋଗୁଁ ମୌସୁମୀ ବାୟୁ ପ୍ରଭାବିତ ହେବନାହିଁ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ କୁହାଯାଇଛି ।