ତିରୁଅନନ୍ତପୁରମ : କେରଳ ବନ୍ୟା ପରିସ୍ଥିତି ଧୀରେ ଧୀରେ ସୁଧୁରିବାରେ ଲାଗିଛି। ପାଣି ଛାଡ଼ିବା ପରେ ଲୋକେ ନିଜ ଘରକୁ ଫେରୁଛନ୍ତି। ବନ୍ୟାରେ ଛାରଖାର ହୋଇଯାଇଥିବା ଘରକୁ ସଜାଡ଼ି ପୁଣି ଥରେ ଜୀବନ ଯାତ୍ରା ସ୍ୱଭାବିକ କରିବାକୁ ଚେଷ୍ଟା କରୁଛନ୍ତି। ଏହାକୁ ଶତାବ୍ଦୀର ସବୁଠୁ ବଡ଼ ବନ୍ୟା ବୋଲି କୁହାଯାଉଛି। ମାତ୍ର ଏହା ପୂର୍ବରୁ ୯୪ ବର୍ଷ ତଳେ ୧୯୨୪ରେ କେରଳ ଏଭଳି ଏକ ଭୟାବହ ବନ୍ୟାର ସମ୍ମୁଖୀନ ହୋଇଥିଲା। ସେତେବେଳେ ଜାତିର ପିତା ମହାତ୍ମା ଗାନ୍ଧି ବନ୍ୟା ପ୍ରପୀଡ଼ିତ କେରଳବାସୀଙ୍କ ସାହାଯ୍ୟ ପାଇଁ ଚାନ୍ଦା ଆଦାୟ କରି ୬ ହଜାର ଟଙ୍କା ପଠାଇଥିଲେ। ଏହାସହ ଲୋକଙ୍କୁ ବନ୍ୟା ପପ୍ରୀଡ଼ିତଙ୍କୁ ସାହାଯ୍ୟ ଯୋଗାଇ ଦେବାକୁ ନିବେଦନ କରିଥିଲେ। ଗାନ୍ଧିଙ୍କ ଆହ୍ୱାନରେ ଲୋକେ ନିଜ ଗହଣା ପର୍ଯ୍ୟନ୍ତ ଦାନ କରିଦେଇଥିଲେ। ବ୍ରିଟିଶ ଅମଳର କାଗଜପତ୍ରରୁ ଏହି କଥା ପଦାକୁ ଆସିଛି। ୧୯୨୪ରେ ଗାନ୍ଧି ନିଜ ଖବରକାଗଜ ‘ୟଙ୍ଗ ଇଣ୍ଡିଆ’ ଏବଂ ‘ନବଜୀବନ’ରେ ମାଲାବର (ବର୍ତ୍ତମାନର କେରଳ) ବନ୍ୟା ପ୍ରପୀଡ଼ିତଙ୍କ ପାଇଁ ସହଯୋଗ ମାଗିଥିଲେ। ଏଥିରେ ଗାନ୍ଧିଜୀ ‘ରିଲିଫ୍ ଇନ୍ ମାଲବାର’ ଶୀର୍ଷକ ଏକ ସ୍ତମ୍ଭରେ ମାଲବାର ଦୁଃଖ ଅକଳ୍ପନୀୟ ବୋଲି ଲେଖିଥିଲେ। ୧୯୨୪ ବନ୍ୟାରେ କେରଳର ମୁନ୍ନାର, ତ୍ରୁଚୁର (ବର୍ତ୍ତମାନର ତ୍ରିଶୁର) କୋଝିକୋଡ଼, ଏର୍ଣ୍ଣାକୁଲମ, ଅଲୁୱା, କୁମାରାକୋମ, ଚିଗନ୍ନୁର ଏବଂ ତିରୁଅନନ୍ତପୁରମ ବିଶେଷ ଭାବେ ପ୍ରଭାବିତ ହୋଇଥିଲେ। ମାଲୟାଲମ କ୍ୟାଲେଣ୍ଡରରେ ଏହାକୁ ସବୁଠୁ ବଡ଼ ବନ୍ୟା ବୋଲି କୁହାଯାଇଥିଲା। ଚଳିତ ବର୍ଷ ବନ୍ୟାରେ କେରଳର ୧୪ ଜିଲାରୁ ୧୧ ଜିଲାରେ ବହୁ କ୍ଷତି ଘଟିଛି। ଏଥିରେ ୩୦୦ରୁ ଊର୍ଦ୍ଧ୍ବ ଲୋକଙ୍କ ମୃତ୍ୟୁ ଘଟିଛି। ୧୦ ଲକ୍ଷରୁ ଊର୍ଦ୍ଧ୍ବ ଲୋକେ ବାସ ହରାଇଛନ୍ତି। ରାଜ୍ୟରେ ପାଖାପାଖି ୨୦ ହଜାର କୋଟି ଟଙ୍କାର କ୍ଷତି ଘଟିଛି।
