ବେଙ୍ଗାଲୁରୁ: ଲୋକପ୍ରିୟ କନ୍ନଡ ଅଭିନେତ୍ରୀ ତଥା ବିଗ୍ ବସ୍ କନ୍ନଡ଼ର ପୂର୍ବତନ ପ୍ରତିଦ୍ବନ୍ଦ୍ବୀ ଜୟଶ୍ରୀ ରମୈୟାଙ୍କର ସନ୍ଦେହଜନକ ମୃତ୍ୟୁ ଘଟିଛି। ବେଙ୍ଗାଲୁରୁସ୍ଥିତ ବାସଭବନରୁ ଜୟଶ୍ରୀଙ୍କ ମୃତଦେହକୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି। ତେବେ ସେ ଆତ୍ମହତ୍ୟା କରିଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି।
ମିଳିଥିବା ସୂଚନା ଅନୁସାରେ, ଜୟଶ୍ରୀ ବିଗତ କିଛିମାସ ହେବ ଡିପ୍ରେସନରେ ପୀଡ଼ିତ ଥିଲେ। ବେଙ୍ଗାଲୁରୁର ସନ୍ଧ୍ୟା କିରଣ ଆଶ୍ରମରେ ତାଙ୍କର ଚିକିତ୍ସା ଚାଲିଥିଲା। ଗତବର୍ଷ ସେ ସୋସିଆଲ ମିଡିଆରେ ଏକ ପୋଷ୍ଟ କରି ଦୁନିଆ ଛାଡ଼ିଦେବା କଥା କହିଥିଲେ। ଜୟଶ୍ରୀ ଲେଖିଥିଲେ, ସେ ଡିପ୍ରେସନରୁ ବାହାରକୁ ଆସିପାରୁ ନାହାନ୍ତି। ସେଥିଲାଗି ସେ ମରିବାକୁ ଚାହୁଁଛନ୍ତି। ତେବେ ଏହାକୁ ପୋଷ୍ଟ କରିବାର କିଛି ସମୟ ପରେ ଡିଲିଟ୍ କରିଦେଇଥିଲେ।
କେବଳ ଏତିକି ନୁହେଁ, ଜୟଶ୍ରୀ କହିଥିଲେ ଯେ ସେ ଡିପ୍ରେସନ ସହିତ ଲଢ଼ିପାରୁ ନାହାନ୍ତି ଏବଂ ଇଚ୍ଛା-ମୃତ୍ୟୁ ଚାହୁଁଛନ୍ତି। ସୂଚନାଯୋଗ୍ୟ, ଜୟଶ୍ରୀ ଜଣେ ଲୋକପ୍ରିୟ କନ୍ନଡ଼ ଅଭିନେତ୍ରୀ ଏବଂ ଡ୍ୟାନ୍ସର ମଧ୍ୟ।୨୦୧୫ରେ ସେ କନ୍ନଡ଼ ରିୟଲିଟି ଶୋ ବିଗ୍ ବସ୍ କନ୍ନଡ଼ରେ ଅଂଶଗ୍ରହଣ କରିଥିଲେ। ସୁପରଷ୍ଟାର କୀଚ୍ଚା ସୁଦୀପ ଏହି ଶୋର ହୋଷ୍ଟ ଥିଲେ। ଜୟଶ୍ରୀଙ୍କ ପ୍ରଥମ ଚଳଚ୍ଚିତ୍ର ଥିଲା ‘Uppu Huli Khara’।
ଜୟଶ୍ରୀଙ୍କ କିଛି ବନ୍ଧୁ କହିଛନ୍ତି ଯେ, ସେ କୌଣସି ପାରିବାରିକ ସମସ୍ୟା ଯୋଗୁ ମାନସିକ ସ୍ତରରେ ଚିନ୍ତିତ ଥିଲେ। ଅନେକ ସମୟରେ ସେ ଅବସାଦରେ ରହୁଥିବା କହୁଥିଲେ। ତାଙ୍କୁ ସେ ଅନେକ ଥର ବୁଝାଇବା ସହିତ ସବୁ ଠିକ୍ ହୋଇଯିବ ବୋଲି କହିଥିଲେ। କିନ୍ତୁ ଜୟଶ୍ରୀ ବାରମ୍ବାର ଫୋନ୍ ନମ୍ବର ବଦଳାଉଥିଲେ, ଯେଉଁଥିପାଇଁ ତାଙ୍କ ସହିତ ସବୁବେଳେ ଯୋଗାଯୋଗ ସମ୍ଭବ ହୋଇପାରୁ ନ ଥିଲା।
