କଲମପୁର: କଲମପୁର ଜୁନାଗଡ଼ ମୁଖ୍ୟ ରାସ୍ତାର ଦେପୁର ନିକଟରେ ଗୁରୁବାର ଏକ ଧାନ ବୋଝେଇ ଟ୍ରାକ୍ଟର ଦୁର୍ଘଟଣାଗ୍ରସ୍ତ ହୋଇଛି। ଫଳରେ ଜଣେ ଶ୍ରମିକ ଆହତ ହେଇଛନ୍ତି। ତାଙ୍କୁ ଉଦ୍ଧାର କରି ଚିକିତ୍ସା ପାଇଁ ପ୍ରଥମେ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରବର୍ତ୍ତୀ ସମୟରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସୂଚନା ଅନୁସାରେ, ଏକ ଟ୍ରାକ୍ଟର ଯୋଗେ ପ୍ରାୟ ୫୦ କ୍ୱିଣ୍ଟାଲ ଧାନ ବୋଝେଇ କରି କଲମପୁର ଥାନା ଅଧିନସ୍ଥ ଦୁଲକିବନ୍ଧ ମାଟିଆପଡ଼ାଠାରୁ ଜୁନାଗଡ଼ ଥାନା ଅଞ୍ଚଳକୁ ଯାଉଥିବା ବେଳେ କଲମପୁର ଜୁନାଗଡ଼ ମୁଖ୍ୟ ରାସ୍ତାର ଦେପୁର ଗ୍ରାମ ନିକଟରେ ଟ୍ରାକ୍ଟରର କ୍ଷମତାଠାରୁ ଅଧିକ ଧାନ ବୋଝେଇ ହୋଇଥିବାରୁ ଚାଳକ ଟ୍ରାକ୍ଟରରୁ ନିୟନ୍ତ୍ରଣ ହରାଇଥିଲେ। ଯେଉଁଥିପାଇଁ ରାସ୍ତାକଡରେ ଧାନ ବୋଝେଇ ଟ୍ରାକ୍ଟର ଓଲଟି ପଡ଼ିଥିଲା। ଫଳରେ ଟ୍ରାକ୍ଟରେ ଥିବା ମାଟିଆପଡ଼ାର ଯଶୋବନ୍ତ ରାଉତ ନାମକ ଶ୍ରମିକ ଧାନ ବସ୍ତା ଭିତରେ ଚାପି ହୋଇଯାଇଥିଲେ। ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଆମ୍ବୁଲାନ୍ସ ସହାୟତାରେ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଶ୍ରମିକଙ୍କ ହାତ ଭାଙ୍ଗି ଯାଇଥିବାରୁ ଅଧିକ ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
Comments are closed.