କଲମପୁର: କଳାହାଣ୍ଡିରେ ଶେଷ ହେଉନାହିଁ ଦାଦନ ସମସ୍ୟା। କେତେବେଳେ କଳାହାଣ୍ଡିର ଶ୍ରମିକ ରାଜ୍ୟ ବାହାରକୁ ଦାଦନ ଖଟିବାକୁ ଯାଇ ହାତ ଗୋଡ କଟା ହେଇ ନିର୍ୟ୍ୟାତିତ ହେଇ ଫେରୁଛନ୍ତି ତ କେତେବେଳେ ଶବ ହେଇ ଫେରୁଛନ୍ତି।ଦାଦନ ଖଟିବାକୁ ଯାଇ ପୁଣି ଏକ ଦାଦନ ଶ୍ରମିକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି।
ପ୍ରାପ୍ତ ସୂଚନା ଅନୁଯାୟୀ କଳାହାଣ୍ଡି ଜିଲାର ଥୁଆମୂଳ ରାମପୁର ବ୍ଲକ ପାଡେପଦର ଗ୍ରାମ ପଞ୍ଚାୟତ ଅଧିନ ଖମାରପଦର ଗ୍ରାମର ଡମେନ ମାଝୀ (୫୦)ନାମକ ବ୍ୟକ୍ତି ମଙ୍ଗଳବାର ଆନ୍ଧ୍ରପ୍ରଦେଶର ବିଜୟବାଡାରେ ଏକ କମ୍ପାନୀକୁ କାମ କରିବା ପାଇଁ ଏକ ଘରୋଇ ବସରେ ଯାଉଥିବା ବେଳେ ଚଳନ୍ତି ବସରୁ ଓହ୍ଲାଇ ପଡିବା ବେଳେ ବସରୁ ପଡି ଯାଇଥିଲେ। ଘଟଣା ସ୍ଥଳରୁ ତୁରନ୍ତ ସ୍ଥାନୀୟ ଡାକ୍ତରଖାନାକୁ ଚିକିତ୍ସା ପାଇଁ ତାଙ୍କ ସାଥିରେ ଯାଉଥିବା ନିଜ ଅଞ୍ଚଳର ଶ୍ରମିକମାନେ ନେଇଥିଲେ। ଚିକିତ୍ସିତ ଅବସ୍ଥାରେ ଡାକ୍ତରଖାନାରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଏଠାରେ ସୂଚନାଯୋଗ୍ୟ ଯେ ସୋମବାର ଡୋମେନ ମାଝୀଙ୍କ ସହ ନିଜ ଗାଁ ଖମାରପଦର ଏବଂ ଭୁତଗୁଡାରୁ ୫ ଜଣ ଏକାଠି ହୋଇ ଦାଦନ ଖଟିବାକୁ ବିଜୟବାଡା ଯାଇଥିଲେ।
