ଆରଡି: ଦୀର୍ଘ ଅଢେଇ ବର୍ଷ ପରେ ଆରଡିପୀଠ ବାବା ଆଖଣ୍ଡଳମଣିଙ୍କ ମନ୍ଦିରରୁ ହଟିଛି ସାପ୍ତାହିକ କୋଭିଡ କଟକଣା। ଏଣିକି ପ୍ରତିଦିନ ମଣିବାବା ଦର୍ଶନ ଦେବେ ଆଗନ୍ତୁକ ଶ୍ରଦ୍ଧାଳୁ ଭକ୍ତଙ୍କୁ। ମଙ୍ଗଳବାର ଏପରି ସୂଚନା ଦେଇଛନ୍ତି ଭଦ୍ରକ ଉପଜିଲାପାଳ ତଥା ମ୍ଯାନେଜିଂ ଟ୍ରଷ୍ଟି ମନୋଜ ପାତ୍ର। ବିଗତ ଅଢେଇ ବର୍ଷରୁ ଉର୍ଦ୍ଧ୍ବ ହେବ ମହାମାରୀ କରୋନାର ଭୟଭୟତାକୁ ନେଇ ପ୍ରଥମେ ମନ୍ଦିରରେ କଟକଣା ସରୂପ ସମସ୍ତ ଭକ୍ତ ସର୍ବସାଧାରଣଙ୍କ ଦର୍ଶନ ଉପରେ ରୋକ ଲଗାଯିବା ଓ ପରେ ଆଶିଂକ ଭାବେ ଦର୍ଶନ ପାଇଁ କଟକଣା ମଧ୍ୟରେ ମନ୍ଦିର ଖୋଲା ଯାଇଥିଲେ ମଧ୍ୟ କୋଭିଡ ନିୟମ ବଳବତ୍ତର ଥିବାରୁ ସପ୍ତାହ ପ୍ରତି ଶନିବାର ମନ୍ଦିର ସାନିଟାଇଜ ପାଇଁ ଭକ୍ତ ଓ ସର୍ବସାଧାରଣ ଦର୍ଶନ ବନ୍ଦ ରଖାଯାଇଥିଲା।
ବର୍ତ୍ତମାନ ଜିଲା ପ୍ରଶାସନ ପକ୍ଷରୁ ସାପ୍ତାହିକ କଟକଣା ଉଠିଥିଲେ ମଧ୍ୟ ପୂର୍ବ ପରି ସକାଳ ୬ଟାରୁ ରାତ୍ର ୮ଟା ଯାଏଁ ମନ୍ଦିର ଖୋଲା ରହିବ ବୋଲି ସୂଚନା ଦିଆଯାଇଛି। ତାହାସହ ମନ୍ଦିରକୁ ଆସୁଥିବା ଭକ୍ତମାନେ ସାମାଜିକ ଦୂରତା ରକ୍ଷା କରିବା ସହ ତୁଣ୍ଡି ବ୍ୟବହାର କରିବା ପାଇଁ ଲିଖିତ ଭାବେ ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଅନ୍ୟ ପକ୍ଷରେ କୋଭିଡ ନିୟମ ଅନୁଯାୟୀ ମଣିବାବାଙ୍କ ଦୈନନ୍ଦିନ ନୀତିକାନ୍ତି କରିବା ପାଇଁ ସେବାୟତଙ୍କୁ ପରାମର୍ଶ ଦେଇଛନ୍ତି ଟ୍ରଷ୍ଚି ଶ୍ରୀ ପାତ୍ର।
