ଭୁବନେଶ୍ବର: ରାଜ୍ୟରେ ବିଜେପି କାର୍ଯ୍ୟକର୍ତ୍ତା ଆତ୍ମ ଚିନ୍ତନ କରି ଦକ୍ଷତା ବଢ଼ାଇବା ଜରୁରୀ। ସେମାନେ ନିଜର ପ୍ରଭାବ ଓ ପରିପକ୍ବତା ବଢ଼ାଇବା ଉଚିତ। ଯୋଗ୍ୟତା, ଉପଯୋଗିତା, ପ୍ରଭାବ ଓ ପରିପକ୍ବ ଉପରେ ଚିନ୍ତନ ଆବଶ୍ୟକ ବୋଲି ରାଜ୍ୟ ବିଜେପି କାର୍ଯ୍ୟକାରିଣୀ ବୈଠକରେ ସଭାପତି ଜେ.ପି.ନଡ୍ଡା ପ୍ରକାଶ କରିଛନ୍ତି।
ଭର୍ଚୁଆଲ୍ ସମାବେଶରେ ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା ଉଦ୍ବୋଧନ ଦେଇ କହିଥିଲେ ଯେ ଓଡ଼ିଶାରେ କର୍ମକର୍ତ୍ତାମାନେ ବିଜେପିକୁ ଧୀରେ ଧୀରେ ଆଗକୁ ବଢ଼ାଇ ପାରିଛନ୍ତି। ଲମ୍ବା ଲଢ଼େଇରେ ବିଜେପି ରାଜ୍ୟରେ ମୁଖ୍ୟ ବିରୋଧୀ ଦଳ ହୋଇଛି। ୨୦୧୪ରେ ଆମକୁ ୨୧%, ଏଥର ଲୋକସଭାରେ ୩୮% ଭୋଟ ମିଳିଛି। ଏହାକୁ ୫୦% ଉପରକୁ ନେବାକୁ ମନରେ ସଂକଳ୍ପ ନେବାକୁ ପଡ଼ିବ। ୫୦%ରୁ ଅଧିକ ଭୋଟ ନେବା ପାଇଁ ଆମ ସମସ୍ତଙ୍କୁ ସଂକଳ୍ପ ନେବାକୁ ପଡ଼ିବ। କାରଣ ରାଜ୍ୟରେ ସରକାର ଗଠନ ଦିନ ଦୂର ନୁହେଁ ବୋଲି ସେ ପ୍ରକାଶ କରିଥିଲେ।
ଦେଶରେ କରୋନା ସଂକ୍ରମଣ ବୃଦ୍ଧି ପାଉଥିଲେ ମଧ୍ୟ ସମୟୋପଯୋଗୀ ଲକ୍ଡାଉନ୍ ଓ ନିର୍ଣ୍ଣୟ ଯୋଗୁଁ କରୋନାରେ ରୋକ୍ ଲାଗିଛି। ନରେନ୍ଦ୍ର ମୋଦିଙ୍କ ଦୃଢ଼ ନେତୃତ୍ବ ଯୋଗୁଁୁ ସଂକ୍ରମଣ ହ୍ରାସ କରାଯାଇପାରିଛି ବୋଲି ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା କହିଥିଲେ।
ଆଜି ପୂର୍ବାହ୍ନ ୧୧ଟାରୁ ସନ୍ଧ୍ୟା ୬ଟା ଯାଏ ଭିଡ଼ିଓ କନ୍ଫରେନ୍ସିଂରେ ବୈଠକ ଚାଲିବ। ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଶ ବୈଠକକୁ ଉଦ୍ଘାଟନ କରିଥିବାବେଳେ ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ପ୍ରତାପ ଷଡ଼ଙ୍ଗୀ, ରାଜ୍ୟ ପ୍ରଭାରୀ ଅରୁଣ ସିଂହ ଓ ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ପ୍ରମୁଖ ଭିଡ଼ିଓ କନ୍ଫରେନ୍ସିଂରେ ଯୋଗ ଦେଇଛନ୍ତି।
