ପୁରୀ: ଲଘୁଚାପ ବର୍ଷାରେ ରାଜ୍ୟସାରା ଲୋକ ହନ୍ତସନ୍ତ ହେଉଥିବା ବେଳେ ଏଥିରୁ ବାଦ୍ ପଡି ନାହଁନ୍ତି ଜଗତର ନାଥ ଜଗନ୍ନାଥ । ମଙ୍ଗଳବାରରେ ଶ୍ରୀମନ୍ଦିର ଜଗମୋହନ ଛାତରୁ ପାଣି ଝରି ଚାନ୍ଦୁଆ ଭିଜିଥିବା ଅଭିଯୋଗ ହୋଇଛି । ଏହାକୁ ନେଇ ସେବାୟତମାନେ ଅସନ୍ତୋଷ ପ୍ରକାଶ କରିଛନ୍ତି । ଜଗମୋହନ ମରାମତି କାର୍ଯ୍ୟ ଅତି ନିମ୍ନମାନର ହୋଇଥିବା ଏହା ପ୍ରମାଣିତ କରୁଛି ବୋଲି ସେବାୟତମାନେ ଅଭିଯୋଗ କରିଛନ୍ତି । ଏନେଇ ତୁରନ୍ତ ପଦକ୍ଷେପ ନେବାକୁ ସେବାୟତମାନେ ପ୍ରଶାସନ ନିକଟରେ ଦାବି କରିଛନ୍ତି। ତିନିମାସ ତଳେ ପ୍ରତ୍ନତତ୍ୱ ବିଭାଗ ଜଗମୋହନର ମରାମତି କାର୍ଯ୍ୟ ଶେଷ କରିଥିଲା । ମାତ୍ର ମଙ୍ଗଳବାରରେ ପାଣି ଗଳିବା ଯୋଗୁଁ ମଙ୍ଗଳା ଆଳତୀ ପରେ ବଲ୍ଲଭ ଭୋଗ ନୀତିରେ ବିଳମ୍ବ ହୋଇଥିବା ଅଭିଯୋଗ ହୋଇଛି । ମାର୍ଚ ୬ ତାରିଖରେ ଓଡିଶା ଉଚ୍ଚ ନ୍ୟାୟାଳୟରେ ଜଗମୋହନର କାର୍ଯ୍ୟ ଶେଷ ହୋଇଥିବା କଥା ପ୍ରତ୍ନତତ୍ୱ ବିଭାଗ ସତ୍ୟପାଠ ଦାଖଲ କରିଥିଲେ । ଏହାପରେ ଏପ୍ରିଲ ୧୬ ତାରିଖରେ ଏହାକୁ ସାଧାରଣ ଭକ୍ତଙ୍କ ଦର୍ଶନ ପାଇଁ ଖୋଲାଯାଇଥିଲା ।
ପ୍ରବଳ ବର୍ଷା ଯୋଗୁଁ ପୁରୀର ରେକର୍ଡ ରୁମ ମଧ୍ୟରେ ପାଣି ପଶିଛି । ସୋମବାର ବିଳମ୍ବିତ ରାତି ଓ ମଙ୍ଗଳବାର ସକାଳେ ପୁରୀରେ ୩୦୦ ଏମ୍ଏମ୍ରୁ ଅଧିକ ବର୍ଷା ହୋଇଥିବା ସୂଚନା ମିଳିଛି । ଏଥିଯୋଗୁଁ ପୁରୀ ସହରରେ ଏକ ପ୍ରକାର ଜଳବନ୍ଦୀ ଅବସ୍ଥା ସୃଷ୍ଟି ହୋଇଥିଲା । ପୁରୀର ୨୬ଟି ସାହିର ଓ ଗଳିରେ ବର୍ଷା ଜଳ ନିଷ୍କାସନ ହୋଇ ନପାରିବାରୁ ଲୋକମାନେ ଜଳ ବନ୍ଦୀ ଅବସ୍ଥାରେ ରହିଥିଲେ । ବଡ ଦାଣ୍ଡ. ଡାକ୍ତର ଖାନା ଛକ, ଷ୍ଟେସନ ନିକଟରେ ବର୍ଷା ପାଣି ଜମି ରହିଥିଲା ।
