ସମାଜ ଡିଜିଟାଲ ଡେସ୍କ/ବାଲେଶ୍ଵର/ଭଦ୍ରକ/ବାସୁଦେବପୁର/ଚାନ୍ଦବାଲି: ଭୀଷଣ ବାତ୍ୟା ‘ଦାନା’ର ଲ୍ୟାଣ୍ଡଫଲ ପ୍ରକ୍ରିୟା ଶେଷ ହେବା ସହିତ ଏହା କ୍ରମଶଃ ଦୁର୍ବଳ ହୋଇ ବାତ୍ୟାରେ ପରିଣତ ହୋଇଛି। ଆଉ କିଛି ଘଣ୍ଟା ପରେ ଏହା ଆହୁରି ଦୁର୍ବଳ ହେବା ସାଙ୍ଗକୁ ଗଭୀର ଅବପାତ ରୂପ ନେବ। ତେଣୁ ଏହା ପ୍ରଭାବରେ ସ୍ଥଳଭାଗରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏଥିପାଇଁ ୩ ଜିଲାକୁ ରେଡ୍ ଆଲର୍ଟ ଜାରି କରିଛି ପାଣିପାଗ ବିଭାଗ। ଏହି ଜିଲାଗୁଡ଼ିକ ହେଉଛି ବାଲେଶ୍ଵର, ଭଦ୍ରକ ଏବଂ ମୟୂରଭଞ୍ଜ। ସେହିପରି ଜଗତସିଂହପୁର, ଅନୁଗୁଳ, ଖୋର୍ଦ୍ଧାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏହାବ୍ୟତୀତ କେନ୍ଦ୍ରାପଡ଼ା, ଯାଜପୁର, କେନ୍ଦୁଘର, କଟକରେ ବି ବର୍ଷା ହେବ।
ବର୍ତ୍ତମାନ ସୁଦ୍ଧା ଚାନ୍ଦବାଲିରେ ସର୍ବାଧିକ ୧୫୮.୬ ମିମି ବର୍ଷା ରେକର୍ଡ କରାଯାଇଛି। ରାଜଗନିକାରେ ୧୫୬, ମାର୍ଶାଘାଇରେ ୧୧୦, ରାଜନଗରରେ ୧୦୦ ମିମି ବର୍ଷା ହୋଇଛି। ବାଲେଶ୍ଵର ଜିଲାର ଔପଦାରେ ୧୦୯, ବାସୁଦେବପୁର ୧୧୦, ପାରାଦୀପ ୭୬.୪, ଡେରାବିଶ ୭୨, ଭଦ୍ରକ ୭୦.୨ ମିଲିମିଟର ବର୍ଷା ହୋଇଥିବା ଜଣାପଡ଼ିଛି।
