ହରଭଙ୍ଗା: ହରଭଙ୍ଗା ବ୍ଲକ ପୁରୁଣାକଟକ ଥାନା ଅର୍ନ୍ତଗତ କଳାଖଣ୍ଡି ନିକଟସ୍ଥ ଲକ୍ଷ୍ମୀନାଳରୁ ପୁଲିସ ଜଣେ ଯୁବକଙ୍କ ମୃତଦେହ ଉଦ୍ଧାର କରିଛି। ମୃତ ଯୁବକ ଜଣକ ସାଲକଟା ଗ୍ରାମର ପ୍ରମୋଦ ଭୋକ୍ତା(୪୫) ବୋଲି ଜଣାପଡ଼ିଛି।
ମିଳିଥିବା ସୂଚନା ଅନୁସାରେ, ଗତ ରବିବାର ପୁରୁଣାକଟକ ପଂଚାୟତ ସାଲକଟା ଗ୍ରାମର ପ୍ରମୋଦ ଭୋକ୍ତା ନିଜ ବନ୍ଧୁ ଘର ଚୁଇଁମାଟି ଗ୍ରାମକୁ ବୁଲିବାକୁ ଯାଇଥିଲେ। ସେଦିନ ରାତିରେ ନାଳପାର ହୋଇ ଘରକୁ ଫେରୁଥିବାବେଳେ ନାଳରେ ଭାସିଯାଇ ଦୁଇଦିନ ହେଲା ନିଖୋଜ ଥିଲେ। ପରିବାର ଲୋକେ ବହୁ ଖୋଜାଖୋଜି ପରେ ବି ତାଙ୍କର କୌଣସି ପତ୍ତା ମିଲିନଥିଲା। ଆଜି ସକାଳୁ ନାଳକୁ କିଛି ଲୋକ ଗାଧୋଇବାକୁ ଯାଇଥିବା ସମୟରେ ବୁଦାମୂଳେ ଏକ ମୃତଦେହକୁ ଦେଖି ପୁଲିକୁ ଖବର ଦେଇଥିଲେ। ଖବର ପାଇ ପୁରୁଣାକଟକ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲା। ମୃତଦେହଟି ସାଲକଟା ଗ୍ରାମର ପ୍ରମୋଦ ଭୋକ୍ତାଙ୍କ ବୋଲି ପୁଲିସ ଚିହ୍ନଟ କରିଛି। ପୁରୁଣାକଟକ ପୁଲିସ ଏକ ଅପମୃତ୍ୟୁ ମାମଲା ରୁଜୁକରି ଶବବ୍ୟବଛେଦ ପାଇଁ ବୌଦ୍ଧ ମେଡିକାଲ ପଠାଇଥିବା ଜଣାପଡ଼ିଛି। ମୃତ ପ୍ରମୋଦଙ୍କ ପତ୍ନୀ ସହ ଗୋଟିଏ ପୁଅ, ଗୋଟିଏ ଝିଅ ଥିବା ଜଣାପଡ଼ିଛି। ତୁରନ୍ତ ମୃତକଙ୍କ ପରିବାରକୁ ଆବଶ୍ୟକୀୟ ସରକାରୀ ସହାୟତା ଯୋଗାଇ ଦେବାକୁ ଦାବୀ ଉଠୁଛି।
Comments are closed.