ଜି.ଉଦୟଗିରି: ଆଜି ଭୋର ସମୟରେ ସ୍ଥାନୀୟ ବ୍ଳକ ଅନ୍ତର୍ଗତ କତିଙ୍ଗିଆ ପଞ୍ଚାୟତର ଟିଆଙ୍ଗିଆ ପିଡିସୁବାଲି ଗ୍ରାମର ଏଡୁଆଡ ନାୟକଙ୍କୁ ଦନ୍ତା ଆକ୍ରମଣ କରିଛି। ତାଙ୍କୁ ଅତର୍କିତ ଭାବେ ଦନ୍ତା ଆକ୍ରମଣ କରିବାରୁ ଏଡୁଆଡ ନାୟକ ଗୁରୁତର ହୋଇଥିବା ଜଣାପଡିଛି। ଆଜି ଭୋର ୫ଟା ସମୟରେ ଟିଆଙ୍ଗିଆ ପିଡୁସୁବାଲି ଗ୍ରାମର ଏଡୁଆଡ ନାୟକ ନିକଟସ୍ତ ଜଙ୍ଗଲରେ ପୋଖରୀରୁ ଶୌଚ ହୋଇ ଫେରୁଥିବାବେଳେ ହଠାତ୍ ଏକ ଦନ୍ତା ହାବୁଡରେ ପଡିଯିବା ଫଳରେ ଆକ୍ରମଣର ଶିକାର ହୋଇଥିଲେ। ଗ୍ରାମର କିଛି ମହାଳା ସେ ସମୟରେ ଜଙ୍ଗଲକୁ ଯାଉଥିବାବେଳେ ଭୟରେ ଗ୍ରାମକୁ ଫେରିଆସି ଗ୍ରାମବାସୀଙ୍କୁ ସୂଚନା ଦେଇଥିଲେ।
ଖବରପାଇ ଘଟଣାସ୍ଥଳରେ ଗ୍ରାମବାସୀ ପହଞ୍ଚି ଏଡୁଆଡକୁ ଉଦ୍ଧାର କରି ଜି.ଉଦୟଗିରି ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ସେଠି ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା କରାଯାଇଥିଲା। ସେଠାରେ ତାଙ୍କର ସ୍ବାସ୍ଥ୍ୟବସ୍ଥା ଉଦବେଗଜନକ ହେବାରୁ ତାଙ୍କୁ ଭୁବନେଶ୍ବରକୁ ସ୍ଥାନାନ୍ତର କରାଯାଇଥିବା ଜଣାପଡିଛି। ଏନେଇ ସ୍ଥାନୀୟ ସରପଞ୍ଚ ବିଭୂତି ପ୍ରଧାନ ଓ ପୂର୍ବତନ ସମିତିସଭ୍ୟ ଗୋପାଳ ନାୟକ ରାଇକିଆ ବନ ବିଭାଗକୁ ଖବର ଦେଉଥିଲେ। ଖବରପାଇ ରାଇକିଆ ବନପାଳ ବିଷ୍ଣୁପ୍ରସାଦ ରଥ ଟିମ ସହ ଘଟଣାସ୍ଥଳରେ ପହଞ୍ଚି ହାତୀର ଗତିବିଧି ଉପରେ ନଜର ରଖିଥିବାବେଳେ ଦୁଇଟି ଦନ୍ତା ଥିବା ସୁଚନା ଦେଇଛନ୍ତି।
Comments are closed.