ଜି.ଉଦୟଗିରି: ଉଦୟଗିରିସ୍ଥିତ ଭଞ୍ଜ ମାର୍କେଟ ସମ୍ମୁଖ ମୁଖ୍ୟ ରାସ୍ତା ଉପରେ ଗୁରୁବାର ଅପରାହ୍ନ ସମୟରେ ଏକ ମାଲବାହୀ ଟ୍ରକର ପଛ ଚକ ତଳେ ଚାପି ହୋଇ ଜଣେ ଯୁବକଙ୍କ ମୃତ୍ୟୁ ଘଟିଛି। ବିବରଣୀରୁ ପ୍ରକାଶ ଯେ, ସୀମାଞ୍ଚଳ ଟ୍ରାନ୍ସପୋର୍ଟ ନାମକ ଏକ ମାଲବାହୀ ଟ୍ରକ ଜି.ଉଦୟଗିରି ଦେଇ ଯାଉଥିବାବେଳେ ଗାନ୍ଧୀଛକ ନିକଟସ୍ଥ ଭଞ୍ଜ ମାର୍କେଟ ସମ୍ମୁଖ ମୁଖ୍ୟ ରାସ୍ତା ଉପରେ ଶଙ୍ଖସାହିର ଶରତ ନାୟକ(୩୭) ନାମକ ଜଣେ ବ୍ୟକ୍ତି କୌଣସି କାରଣ ବସତଃ ଟ୍ରକର ପଛ ଚକ ତଳେ ପଡିଯାଇଥିଲେ। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଛି। ଖବରପାଇ ପରିବାର ଲୋକଙ୍କ ସହ ସାହି ଭାଇ ଘଟଣାସ୍ଥଳରେ ପହଞ୍ଚି ରାସ୍ତା ଉପରେ ବସି ରହିଥିଲେ। ଫଳରେ କିଛି ସମୟ ପାଇଁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହେବାରୁ ମୁଖ୍ୟ ରାସ୍ତା ଦେଇ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଥିଲା। ତୁରନ୍ତ ଘଟଣାସ୍ଥଳରେ ଆମ୍ବୁଲାନ୍ସ ପହଞ୍ଚି ମୃତ ବ୍ୟକ୍ତିଙ୍କୁ ଗୋଷ୍ଠି ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ଉପଖଣ୍ଡ ପୁଲିସ ଅଧିକାରୀ ବିଜୟ କୁମାର ବିଶି, ଥାନା ଅଧିକାରୀ ଭଗବାନ ପୂଜାରୀ,ଏସ ଆଇ ଅନନ୍ତ ପ୍ରଧାନ,ଏସ ଆଇ କେ କାମରାଜୁ ପ୍ରମୁଖ ସଦଳବଳେ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ପୁଣି ଯାତାୟତ ସ୍ବାଭାବିକ ହୋଇଥିଲା। ରାସ୍ତା ପାର୍ଶ୍ବରେ ପରିବାର ଲୋକ ଧାରଣାରେ ବସିଥିବା ଜଣାପଡିଛି।
ପ୍ରକାଶ ଥାଉକି, ସହରର ମୁଖ୍ୟ ରାସ୍ତା ଓସାରିଆ ହେବା ସହିତ ଯଦି ବାଇପାସ ରାସ୍ତା ଥାଆନ୍ତା ତେବେ ଏପରି ମର୍ମନ୍ତୁଦ ସଡକ ଦୁର୍ଘଟଣାକୁ ଏଡାଇ ଯାଇପାରିଥାନ୍ତା ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି।
Comments are closed.