ଭୁବନେଶ୍ଵର : ଦୀର୍ଘ ୭ ବର୍ଷ ଧରି ୧୬ନଂ ଜାତୀୟ ରାଜପଥରେ ଥିବା ରାଜଧାନୀ ଭୁବନେଶ୍ୱରର ହଂସପାଳ ଫ୍ଲାଏଓଭର ବ୍ରିଜର ଆଜି ଶିଳାନ୍ୟାସ କରାଯାଇଛି । ସୋମବାର ସକାଳ ପ୍ରାୟ ୮ଟାରେ ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ ହଂସପାଳ ଫ୍ଲାଏଓଭର ଶିଳାନ୍ୟାସ କରିଛନ୍ତି ।
ଏହି ପ୍ରକଳ୍ପ ନିର୍ମାଣ ପାଇଁ ଇଞ୍ଜିନିୟରିଂ, କ୍ରୟ ଏବଂ କନଷ୍ଟ୍ରକସନ (ଇପିସି) ମୋଡରେ ଆନୁମାନିକ ୩୦ କୋଟି ଟଙ୍କା ବ୍ୟୟ ଅଟକଳ କରାଯାଇଛି । ୫.୫ କିଲୋମିଟର ଲମ୍ବର ଫ୍ଲାଏଓଭର ପାଇଁ ନ୍ୟାସନାଲ ହାଇୱେ ଅଥରିଟି ଅଫ୍ ଇଣ୍ଡିଆ ଟେଣ୍ଡର ଭରିଛି। ଏହି ଫ୍ଲାଏଓଭର ନିର୍ମାଣ କରିବାର ଅବଧି ଦେଢ ବର୍ଷ ରଖାଯାଇଥିବା ବେଳେ ନିର୍ମାଣ ପରେ ଏହାର ରକ୍ଷଣାବେକ୍ଷଣ ଅବଧି ୬୦ ମାସ ରଖାଯାଇଛି ।
ଏହି ଫ୍ଲାଏଓଭର ନିର୍ମାଣ ହେଲେ ନହରକଣ୍ଟା, ହରିଦାସପୁର, ରୁଦ୍ରପୁର, ସୁନ୍ଦରପାଟଣା, ବଙ୍ଗୁଆରୀ, ହଂସପାଳ, ବାଲିଅନ୍ତା, ଭିଙ୍ଗାରପୁର ଅଞ୍ଚଳର ଲୋକମାନେ ଉପକୃତ ହେବେ। ଫ୍ଲାଏଓଭର ଶିଳାନ୍ୟାସ ସମୟରେ ସାଂସଦ ଅପରାଜିତା ଷଡଙ୍ଗୀ କହିଛନ୍ତି ଯେ ଯେପରି ପ୍ରକଳ୍ପ ଠିକ ସମୟରେ ଶେଷ ହେବ, ସେଥିପାଇଁ ଏନଏଚଏଆଇ ପ୍ରକଳ୍ପ ନିର୍ଦ୍ଦେଶକ ଏବଂ ସ୍ଥାନୀୟ ବାସିନ୍ଦାଙ୍କୁ ନେଇ ଏକ କମିଟି ଗଠନ କରାଯାଇଛି। ଜୁଲାଇ ୨୦୧୯ ରେ, ସଡକ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡକରୀଙ୍କ ସହ ସାଂସଦ ହଂସପାଳ ଫ୍ଲାଏଓଭର ନିର୍ମାଣକୁ ନେଇ ଏକ ବୈଠକ କରିଥିଲେ ଏବଂ ଗତ ବର୍ଷ ଅକ୍ଟୋବରରେ ଏହି ପ୍ରକଳ୍ପର ଅଗ୍ରଗତି ବିଷୟରେ ଘୋଷଣା କରିଥିଲେ ।
ଏହି ଫ୍ଲାଏଓଭର ବ୍ରିଜ ପାଇଁ ସହାୟତା କରିଥିବାରୁ ସେ ନୀତିନ ଗଡ଼କରୀ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଇଛନ୍ତି । ଏହାସହ ଏହି ବ୍ରିଜ ନିର୍ମାଣରେ ଯଦି କିଛି ବି ବାଧାବିଘ୍ନ ଆସେ ସାଂସଦ ହିସାବରେ ସବୁ କିଛି ସମାଧାନ କରିବେ ବୋଲି ପ୍ରତିଶୃତି ଦେଇଛନ୍ତି ।
