ବ୍ୟାଙ୍କ ଡକାୟତିରେ ସଂପୃକ୍ତ ପୂର୍ବତନ ପରିଚାଳକ; ସହକର୍ମୀଙ୍କୁ ହତ୍ୟାକଲେ

ମୁମ୍ବଇ: ଜଣେ ପୂର୍ବତନ ବ୍ୟାଙ୍କ ପରିଚାଳକ ଶେଷରେ ନିଜେ ବ୍ୟାଙ୍କ ଡକାୟତି କରିଛନ୍ତି। ତାହାସହିତ ତାଙ୍କର ଜଣେ ପୂର୍ବତନ ମହିଳା ସହକର୍ମୀଙ୍କୁ ମଧ୍ୟ ଏଥିପାଇଁ ହତ୍ୟା କରିଛନ୍ତି। ଏଭଳି ଏକ ଘଟଣା ଘଟିଛି ମହାରାଷ୍ଟ୍ରର ବିରାର ଅଞ୍ଚଳରେ। ଗୁରୁବାର ରାତିରେ ବିରାରରେ ଥିବା ଆଇସିଆଇସିଆଇ ବ୍ୟାଙ୍କ ଶାଖାରେ ଏହି ଜଘନ୍ୟ ଘଟଣା ଘଟିଛି। ଘଟଣାରେ ସଂପୃକ୍ତ ଅଭିଯୁକ୍ତମାନଙ୍କ ମଧ୍ୟରେ ଉକ୍ତ ବ୍ୟାଙ୍କର ଜଣେ ପୂର୍ବତନ ପରିଚାଳକ ସଂପୃକ୍ତ ଯିଏ ବର୍ତ୍ତମାନ ଆକ୍ସିସ ବ୍ୟାଙ୍କରେ ପରିଚାଳକ ଭାବେ କାର୍ଯ୍ୟ କରୁଛନ୍ତି। ଗୁରୁବାର ରାତି ୮ଟାରେ ଡକାୟତି ଘଟଣା ଘଟିଛି। ବ୍ୟାଙ୍କର କର୍ମଚାରୀମାନେ ସେମାନଙ୍କ କାମ ସାରି ଘରକୁ ଚାଲିଯାଇଥିଲେ ଏବଂ କେବଳ ବ୍ୟାଙ୍କ ଶାଖା ପରିଚାଳକ ଏବଂ କ୍ୟାସିୟର ଥିଲେ। ସେହି ସମୟରେ ଦୁଇଜଣ ଲୋକ ବ୍ୟାଙ୍କ ଭିତରକୁ ଆସିଥିଲେ। ସେମାନଙ୍କ ମଧ୍ୟରୁ ଜଣେ ଉକ୍ତ ବ୍ୟାଙ୍କର ପୂର୍ବତନ ପରିଚାଳକ ଥିଲେ। ଅଭିଯୁକ୍ତ ବର୍ତ୍ତମାନର ଶାଖା ପରିଚାଳକ ଓ କ୍ୟାସିୟରଙ୍କୁ ଜାଣିଥିଲେ। ସେମାନେ ସିଧା ଲକର ନିକଟକୁ ଯାଇଥିଲେ। ସାଙ୍ଗରେ ସେମାନେ ଧାରୁଆ ଅସ୍ତ୍ର ଆଣିଥିଲେ। ସେଥିରେ ଶାଖା ପରିଚାଳକଙ୍କୁ ଭୟଭୀତ କରାଇ ଲକର ଖୋଲିବାକୁ ଧମକ ଦେଇଥିଲେ। ଲକର ଖୋଲାଯିବା ପରେ ଦୁହେଁ ବ୍ୟାଗରେ ଟଙ୍କା ଭର୍ତ୍ତି କରିଥିଲେ। ଏହା ମଧ୍ୟରେ ବ୍ୟାଙ୍କ ଶାଖା ପରିଚାଳକ ସତର୍କ ଘଣ୍ଟି ବଜାଇବାକୁ ଉଦ୍ୟମ କରିଥିଲେ। ଏଥିରେ ଉତ୍‍କ୍ଷିପ୍ତ ହୋଇ ଅଭିଯୁକ୍ତ ଶାଖା ପରିଚାଳକଙ୍କ ତଣ୍ଟି କାଟି ତାଙ୍କୁ ହତ୍ୟା କରିଥିଲେ। ଏଥିସହିତ ସେମାନେ କ୍ୟାସିୟରଙ୍କୁ ମଧ୍ୟ ଆକ୍ରମଣ କରିଥିଲେ। କିନ୍ତୁ ଉକ୍ତ ମହିଳା କ୍ୟାସିୀୟର ଜଣକ ବାହାରକୁ ଚାଲିଆସି ସାହାଯ୍ୟ ପାଇଁ ଚିତ୍କାର କରିଥିଲେ। ରାସ୍ତାରେ ଯାଉଥିବା ଲୋକମାନେ ଅନ୍ୟତମ ଅଭିଯୁକ୍ତ ବ୍ୟାଙ୍କର ପୂର୍ବତନ ପରିଚାଳକଙ୍କୁ ଧରିନେଇଥିଲେ। ତାଙ୍କୁ ସେଠାରେ ଥିବା ପୁଲିସ କର୍ମଚାରୀଙ୍କୁ ହସ୍ତାନ୍ତର କରାଯାଇଥିଲା। ଅନ୍ୟ ଅଭିଯୁକ୍ତ ଜଣକ ସେଠାରୁ ଖସି ପଳାଇଯାଇଥିଲେ। ତାଙ୍କୁ ଖୋଜା ଚାଲିଛି। ପୁଲିସ କହିଛି ଯେ ପୂର୍ବତନ ବ୍ୟାଙ୍କ ପରିଚାଳକଙ୍କୁ ବ୍ୟାଙ୍କ କର୍ମଚାରୀଙ୍କ କାର୍ଯ୍ୟ ସମୟ ଏବଂ କିଏ କେତେବେଳେ ଆସନ୍ତି, ଯାଆନ୍ତି ତାହା ଜଣାଇଥିଲା। ତାହାସହିତ ମାସ ଶେଷଭାଗରେ ସେମାନେ କିଭଳି ଡେରି ରାତି ପର୍ଯ୍ୟନ୍ତ ରହନ୍ତି ତାହା ମଧ୍ୟ ସେ ଜାଣିଥିଲେ। ସେହି ଆଧାରରେ ସେ ବ୍ୟାଙ୍କ ଡକାୟତି କରିବା ଯୋଜନା ପ୍ରସ୍ତୁତ କରିଥିଲେ।