ଅନ୍ତର୍ଜାତୀୟ ଜୁଡୋ ଖେଳାଳି ଇଶାନ ପ୍ରଧାନଙ୍କୁ ସମ୍ବର୍ଦ୍ଧନା

ସମ୍ବଲପୁର: ସମ୍ବଲପୁର ମାଟିର ପୁଅ ତଥା ଅନ୍ତର୍ଜାତୀୟ ଜୁଡୋ ଖେଳାଳି ଇଶାନ କୁମାର ପ୍ରଧାନଙ୍କୁ ସମ୍ବଲପୁର ଜିଲାପାଳଙ୍କ ଦ୍ୱାରା ସମ୍ବର୍ଦ୍ଧନା ଦିଆଯାଇଛି । ଜିଲାପାଳଙ୍କ କାର୍ଯ୍ୟାଳୟରେ ସିଦ୍ଧେଶ୍ୱର ବଳିରାମ ବୋନ୍ଦର ଈଶାନଙ୍କୁ ସୁନାମ ଅର୍ଜନ କରିଥିବା ଏବଂ ଆଗାମୀ ଦିନରେ ସେ ଖେଳିବାକୁ ଥିବା ଅନ୍ତର୍ଜାତୀୟ ଜୁଡୋ ପ୍ରତିଯୋଗିତା ପାଇଁ ଶୁଭେଚ୍ଛା ଦେଇଥିଲେ । ଏଥି ସହ ଜିଲାପାଳ ପୁଷ୍ପ ଗୁଚ୍ଛ ପ୍ରଦାନ କରି ଈଶାନ୍ତଙ୍କୁ ଅଭିନନ୍ଦନ ଜଣାଇଥିଲେ । ସମ୍ବଲପୁର ଗୋବିନ୍ଦତୋଲା ନିବାସୀ ଜିତେନ୍ଦ୍ର ପ୍ରଧାନ ଓ ସଙ୍ଗୀତା ପ୍ରଧାନଙ୍କ ପୁତ୍ର ଇଶାନ ଆଗାମୀ ନଭେମ୍ବର ୭ ତାରିଖରେ ୟୁରୋପର ହଙ୍ଗେରୀରେ ଆୟୋଜିତ ହେବାକୁ ଥିବା ଜୁଡୋ ପ୍ରଶିକ୍ଷଣ ଶିବିରରେ ଭାଗ ନେବେ ଏବଂ ୟୁରୋପୀୟନ ଚାମ୍ପିଅନଶିପ ପ୍ରତିଯୋଗିତାରେ ଅଂଶଗ୍ରହଣ କରିବେ । ଏହା ପୂର୍ବରୁ ଈଶାନ ୨୦୨୦ ଓ ୨୦୨୧ରେ ଜାତୀୟ ପ୍ରତିଯୋଗିତାରେ ରୌପ୍ୟ ପଦକ ହାସଲ କରି ସାରିଛନ୍ତି । ଏକ ବର୍ଷ ପାଇଁ କଳିଙ୍ଗ ଷ୍ଟାଡିୟମଠାରେ କୋଚ୍‌ ଗୀତାଞ୍ଜଳି ପଣ୍ଡାଙ୍କ ଅଧୀନରେ ପ୍ରଶିକ୍ଷଣ ନେଇଥିବା ଈଶାନ ବର୍ତ୍ତମାନ ଗୋଆର ସାଇ ଏସଟିଟି ପୋଣ୍ଡାଠାରେ କୋଚ ସୁଶୀଲ ଗାଏକ୍ୱାଡଙ୍କ ଅଧୀନରେ ପ୍ରଶିକ୍ଷଣ ନେଉଛନ୍ତି । ଆଗାମୀ ଦିନରେ ହଙ୍ଗେରୀଠାରେ ହେବାକୁ ଥିବା ଆନ୍ତର୍ଜାତିକ ଜୁଡୋ ପ୍ରତିଯୋଗିତାରେ ସର୍ବଶ୍ରେଷ୍ଠ ପ୍ରଦର୍ଶନ କରିବେ ବୋଲି ଇଶାନ କହିଛନ୍ତି । ଜିଲାପାଳଙ୍କ କାର୍ଯ୍ୟାଳୟରେ ଆୟୋଜିତ ସମ୍ବର୍ଦ୍ଧନା କାର୍ଯ୍ୟକ୍ରମରେ ଇଶାନଙ୍କ ସହିତ ତାଙ୍କର ଜେଜେମା ସୁଖଲତା ନାୟକ, ଜିଲା କ୍ରୀଡା ଅଧିକାରୀ ସତ୍ୟ ନାରାୟଣ ତାଣ୍ଡି, ପୂର୍ବତନ ଜିଲା କ୍ରୀଡା ଅଧିକାରୀ ଉପେନ୍ଦ୍ର କୁମାର ଶତପଥୀ, ଲକ୍ଷ୍ମଣ କୁମାର ମେହେର, ଏମ. ଏନ. ରହମାନ ପ୍ରମୁଖ ଉପସ୍ଥିତ ଥିଲେ।