ସମ୍ବଲପୁରରେ ଏନକାଉଣ୍ଟର; ଦୁର୍ଦ୍ଦାନ୍ତ ଅପରାଧୀ ମୋସିମ ଆହତ

ସମ୍ବଲପୁର: ସମ୍ବଲପୁର ସିଟି ଷ୍ଟେଶନ ନିକଟରେ ସୋମବାର ଭୋର ସମୟରେ ଏନକାଉଣ୍ଟର ଘଟିଛି। ଧନୁପାଲି ପୁଲିସ ଏବଂ ସ୍ପେଶାଲ ସ୍କ୍ବାଡ୍‌ର ମିଳିତି ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ମୋସିମ ଅଖତାର ଓରଫ ବିଟୁ(୩୨) ଆହତ ହୋଇଛି। ତା’ ନାଁରେ ବିଭିନ୍ନ ଥାନାରେ ୧୫ରୁ ଅଧିକ ମାମଲା ରହିଛି।

ଦୁଇ ଜଣ ଦୁର୍ଦ୍ଦାନ୍ତ ଅପରାଧୀ ସିଟି ରେଳ ଷ୍ଟେଶନ ନିକଟରେ ଆପରାଧିକ ଯୋଜନା କରୁଥିବା ନେଇ ଖବର ମିଳିବା ପରେ ସ୍ପେଶାଲ ସ୍କ୍ବାଡ ଏବଂ ଧନୁପାଲି ପୁଲିସ ପକ୍ଷରୁ ଭୋର ୫ଟା ୨୦ରେ ମିଳିତ ଭାବେ ଚଢ଼ାଉ କରାଯାଇଥିଲା। ପୁଲିସକୁ ଦେଖି ମୋସିମ ପୁଲିସ ଉପରକୁ ୨ ରାଉଣ୍ଡ ଗୁଳି ଚଳାଇଥିଲା। ପୁଲିସ ମଧ୍ୟ ପାଲଟା ଜବାବ ଦେଇ ଗୋଟିଏ ରାଉଣ୍ଡ ଗୁଳି ଚଳାଇଥିଲା। ଏଥିରେ ମୋସିମ ଆହତ ହୋଇଥିଲା। ଅନ୍ୟ ଜଣେ ଅପରାଧୀ ସେଠାରୁ ଖସି ପଳାଇବାରେ ସକ୍ଷମ ହୋଇଥିଲା। ପୁଲିସ ମୋସିମଠାରୁ ଏକ ୯ ଏମଏମ ବନ୍ଧୁକ ସହ ଗୁଳି, ୧ ମୋବାଇଲ ଫୋନ ଏବଂ ୪ ହଜାର ଟଙ୍କା ଜବତ କରିଛି। ଏହା ସହିତ ଗୁଳିବିନିମୟ ସମୟରେ ଜଣେ ପୁଲିସ ଏଏସଆଇ ଆହତ ହୋଇଛନ୍ତି। ଆହତ ମୋସିମକୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।

Comments are closed.