କେନ୍ଦ୍ରମନ୍ତ୍ରୀ ରାମବିଳାସ ପାଶ୍ବାନଙ୍କ ପରଲୋକ ପରେ ଖାଲି ହୋଇଥିବା ବିହାର କୋଟାରେ ଖାଲିଥିବା ରାଜ୍ୟସଭା ଆସନ ଲାଗି ଡ଼ିସେମ୍ବର ୧୪ରେ ହେବ ଉପନିର୍ବାଚନ । ଗୁରୁବାର ନିର୍ବାଚନ ଆୟୋଗ ଏ ସଂକ୍ରାନ୍ତରେ ସୂଚନା ଦେଇଛନ୍ତି । ନଭେମ୍ବର ୨୬ ତାରିଖରେ ଏଥିନେଇ ବିଜ୍ଞପ୍ତି ପ୍ରକାଶ କରାଯିବ ଏବଂ ଡ଼ିସେମ୍ବର ୧୪ରେ ଭୋଟ ଗଣନା ହେବ । ରାମ ବିଳାସ ପାସୱାନଙ୍କ କାର୍ଯ୍ୟକାଳ ୨୦୨୪ ଏପ୍ରିଲରେ ଶେଷ ହୋଇଥାଆନ୍ତା । ମାତ୍ର ଦୀର୍ଘ ଅସୁସ୍ଥତା ପରେ ସେ ଗତ ଅକ୍ଟୋବର ୮ ତାରିଖରେ ଦିଲ୍ଲୀରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ । କେନ୍ଦ୍ର ମନ୍ତ୍ରୀ ତଥା ବିଜେପି ନେତା ରବି ଶଙ୍କର ପ୍ରସାଦ ୨୦୧୯ ଲୋକସଭା ନିର୍ବାଚନରେ ବିଜୟୀ ହେବା ପରେ ଏହି ଆସନ ଖାଲି ପଡ଼ିଥିଲା ଏବଂ ଏଠାରୁ ରାମବିଳାସ ବିଜୟୀ ହୋଇ କେନ୍ଦ୍ରରେ ମନ୍ତ୍ରୀ ଭାବରେ ଅଧିଷ୍ଠିତ ହୋଇଥିଲେ ।
ଅପରପକ୍ଷରେ ଏହି ଆସନରୁ ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ସୁଶୀଲ ମୋଦୀଙ୍କୁ ପ୍ରାର୍ଥୀ କରାଯାଇପାରେ ବୋଲି କଳ୍ପନାଜଳ୍ପନା ପ୍ରକାଶ ପାଇଛି । ସୁଶୀଲ ମୋଦୀଙ୍କୁ ଚଳିତ ଥର ବିଜେପି ଉପମୁଖ୍ୟମନ୍ତ୍ରୀ ପଦ ଦେଇନାହିଁ । ତାଙ୍କ ସ୍ଥାନରେ ଦଳ ଅନ୍ୟ ଦୁଇଜଣଙ୍କୁ ଉପମୁଖ୍ୟମନ୍ତ୍ରୀ ପଦ ପ୍ରଦାନ କରାଯାଇଛି । ଏଥିରେ ସୁଶୀଲ ଦୁଃଖିତ ହୋଇଥିବା ଚର୍ଚା ହେବା ପରେ ତାଙ୍କୁ କେନ୍ଦ୍ରକୁ ନିଆଯାଇ ମନ୍ତ୍ରୀ ପଦ ଦିଆଯାଇପାରେ ବୋଲି କୁହାଯାଉଛି ।
