ନୂଆଦିଲ୍ଲୀ : ଭାରତୀୟ ପ୍ରତିରକ୍ଷା ଗବେଷଣା ସଙ୍ଗଠନ(ଡିଆରଡିଓ) ଖୁବ୍ ଶୀଘ୍ର ଭାରତରେ ପ୍ରସ୍ତୁତ ହୋଇଥିବା ଲେଜର ଅସ୍ତ୍ର ଦୁର୍ଗା-୨ର ପରୀକ୍ଷଣ କରିବ । ସଫଳ ହେବା ପରେ ଏହାକୁ ଦେଶର ସୀମାରେ ବ୍ୟବହାର କରାଯିବ । ଲେଜର ହିଁ ଭବିଷ୍ୟତର ଅସ୍ତ୍ର । ଅନେକ ଦେଶ ପାଖରେ ଲେଜର ଅସ୍ତ୍ର ରହିଛି । ଡିଆରଡିଓ ମଧ୍ୟ ଏହି ଅସ୍ତ୍ର ପ୍ରସ୍ତୁତ ଆରମ୍ଭ କରିଛି । ଏହି ଦୁର୍ଗା-୨ କୌଣସି ବି ବାଲିଷ୍ଟିକ୍, କ୍ରୁଜ୍ ମିସାଇଲ ବା ଯୁଦ୍ଧ ଜାହାଜକୁ ମାରି ଖସାଇ ପାରିବାରେ ସକ୍ଷମ ହେବ । ଚୀନ ଏବଂ ପାକିସ୍ତାନ ସୀମାରେ ଏହାକୁ ବ୍ୟବହାର କରିବା ପାଇଁ ପ୍ରାଥମିକ ଲକ୍ଷ୍ୟ ରଖାଯାଇଛି ।
ଚୀନ ବା ପାକିସ୍ତାନର ବାଲିଷ୍ଟିକ୍ ମିସାଇଲ ଭାରତର ସୁରକ୍ଷା ପାଇଁ ବଡ ବିପଦ । ଭାରତ ଋଷରୁ ୫ଟି ଏସ-୪୦୦ ଆଣ୍ଟି-ମିସାଇଲ ସିଷ୍ଟମ କ୍ରୟ କରିଛି । ଏହାର ନାଁ ସୁଦର୍ଶନ ରଖାଯାଇଛି । ଏହି ସିଷ୍ଟମ ଭାରତରେ ପଡିବାକୁ ଥିବା ମିସାଇଲକୁ ଆକାଶରେ ହିଁ ନଷ୍ଟ କରିପାରିବ । କିନ୍ତୁ ଏହା ସବୁ ମିସାଇଲକୁ ମାରି ଖସାଇପାରିବ, ଏହାର ଗ୍ୟାରେଣ୍ଟି ନାହିଁ । ୨୦୧୭ ମସିହାରେ ଡିଆରଡିଓ ୧ କିଲୋଓ୍ବାଟ ଲେଜର ସିଷ୍ଟମକୁ ଏକ ଟ୍ରକରେ ଲଗାଇଥିଲା । ଚିତ୍ରଦୁର୍ଗରେ ପରୀକ୍ଷଣ କରାଯାଇଥିଲା । ଏହାର ଲେଜର ରଶ୍ମି ୨୫୦ ମିଟର ପର୍ଯ୍ୟନ୍ତ ଯାଇଥିଲା । ଏହାକୁ ଅଧିକ କ୍ଷମତାଶାଳୀ କରିବା ପାଇଁ ଚେଷ୍ଟା କରୁଛି ଭାରତ ।
