ନାଟ୍ୟକାର ଇଂ କିଶୋର ମହାପାତ୍ରଙ୍କ ପରଲୋକ

ଭୁବନେଶ୍ୱର : ଯାତ୍ରା ଜଗତର ପ୍ରଖ୍ୟାତ ନାଟ୍ୟକାର ଇଂ କିଶୋର ମହାପାତ୍ରଙ୍କ ସୋମବାର ସନ୍ଧ୍ୟାରେ ପରଲୋକ ଘଟିଛି। ଅସୁସ୍ଥତା ଯୋଗୁଁ କଟକସ୍ଥିତ ଏକ ନର୍ସିଂ ହୋମ୍‌ରେ ସେ ଚିକିତ୍ସାଧୀନ ଥିଲେ। ସୋମବାର ସନ୍ଧ୍ୟାରେ ସେଠାରେ ତାଙ୍କର ମୃତ୍ୟୁ ଘଟିଥିଲା। ତାଙ୍କୁ ୮୫ବର୍ଷ ହୋଇଥିଲା। ମୃତଦେହ ରାତିରେ ତାଙ୍କ ଜନ୍ମସ୍ଥାନ ଜଗତସିଂହପୁର ଜିଲା ରଘୁନାଥପୁର ଅନ୍ତର୍ଗତ ରେଢୁଆକୁ ନିଆଯାଇ ସେଠାରେ ଶେଷକୃତ୍ୟ ସମ୍ପନ୍ନ ହୋଇଛି। ମୃତ୍ୟୁଶଯ୍ୟା ନିକଟରେ ପତ୍ନୀ ଜ୍ୟୋତିର୍ମୟୀ, ପୁତ୍ର ନାଟ୍ୟକାର ଇଂ ଆଶୁତୋଷ, ଦୁଇ କନ୍ୟା ଅସ୍ମିତା ଓ ଆଶ୍ରିତା ଉପସ୍ଥିତ ଥିଲେ।
ଭୁବନେଶ୍ବର ମହିଳା ପଲିଟେକ୍‌ନିକ୍‌ରେ ଇଂ ମହାପାତ୍ର ଦୀର୍ଘ ବର୍ଷ ଧରି କାର୍ଯ୍ୟ କରିବା ସହ ଯାତ୍ରା ନାଟକ ରଚନାରେ ମନୋନିବେଶ କରିଥିଲେ। ତାଙ୍କ ରଚିତ ସଫଳ ନାଟକ ମଧ୍ୟରେ- ଦେଢ଼ ଦିନର ସ୍ବାମୀ, ପୁରୀରୁ ପଟ୍ଟାମୁଣ୍ଡାଇ, ସୁର ସାର୍‌ଙ୍କ ସାନଝିଅ, ଯାହା କହିବି ସତ କହିବି, ଲାଲ୍‌ ଶାଢ଼ି ନୀଳ ବ୍ଲାଉଜ୍‌, ରାତି ନଅରୁ ଭୋର୍‌ ୬ ପ୍ରଭୃତି ଏକାଧିକ ନାଟକ ଦର୍ଶକଙ୍କୁ ପ୍ରଭାବିତ କରିଥିଲା। ତାଙ୍କର ଏକାଧିକ ନାଟକରେ ଅନୁଭବୀ ନିର୍ଦେଶକ ସୀତାକାନ୍ତ ମହାନ୍ତି ନିର୍ଦେଶନା ଦେଇଥିଲେ। ଇଂ ମହାପାତ୍ରଙ୍କ ଶେଷ ନାଟକ ଥିଲା ‘ଆକାଶ କଇଁଆ ଚିଲିକା ମାଛ।’ ଯାତ୍ରାଶ୍ରୀ ବିଶ୍ବ ଦରବାର ପରିବେଷିତ ଏହି ନାଟକକୁ ଦର୍ଶକ ବେଶ୍‌ ପସନ୍ଦ କରିଥିଲେ। ତାଙ୍କ ବିୟୋଗରେ ଯାତ୍ରା ନାଟକ କ୍ଷେତ୍ରରେ ଗଭୀର ଶୂନ୍ୟସ୍ଥାନ ସୃଷ୍ଟି ହୋଇଛି।