ନୂଆଦିଲ୍ଲୀ : ଆଇଏନ୍ଏକ୍ସ ମିଡିଆ ଦୁର୍ନୀତି ମାମଲାରେ ପୂର୍ବତନ ଅର୍ଥମନ୍ତ୍ରୀ ପି. ଚିଦମ୍ବରମ୍ଙ୍କୁ ଦିଲ୍ଲୀ ହାଇକୋର୍ଟ ଜାମିନ୍ ଦେବାକୁ ଦେବାକୁ ମନା କରିଦେଇଛନ୍ତି । ବିଚାରପତି ସୁରେଶ କୈତ୍ କହିଛନ୍ତି, କଂଗ୍ରେସ ନେତା ପ୍ରମାଣପତ୍ରରେ ହେରଫେର୍ କରିବାରେ ସମ୍ଭାବନା ନ ଥିଲେ ମଧ୍ୟ ସାକ୍ଷୀମାନଙ୍କୁ ପ୍ରଭାବିତ କରିବାର ସମ୍ଭାବନା ଥିବାରୁ ତାଙ୍କୁ ଜାମିନ୍ ଦିଆଯିବ ନାହିଁ।
ଅଗଷ୍ଟ ୨୧ ତାରିଖରେ ସିବିଆଇଦ୍ୱାରା ଗିରଫ ହୋଇ ଶ୍ରୀ ଚିଦମ୍ବରମ୍ ହାଜତରେ ଅଛନ୍ତି ଏବଂ ପୂର୍ବରୁ ସେ ନିମ୍ନ ଅଦାଲତରେ ଜାମିନ ଆବେଦନ ନ କରି ସିଧାସଳଖ ହାଇକୋର୍ଟରେ ନିୟମିତ ଜାମିନ୍ ପାଇଁ ଆବେଦନ କରିଥିଲେ। ନୂଆଦିଲ୍ଲୀସ୍ଥିତ ବାସଭବନରୁ ଶ୍ରୀ ଚିଦମ୍ବରମ୍ଙ୍କୁ ଗିରଫ କରାଯିବା ପରେ ଅକ୍ଟୋବର ୩ ତାରିଖ ପର୍ଯ୍ୟନ୍ତ ତାଙ୍କୁ ତିହାର୍ ଜେଲରେ ବିଚାର ବିଭାଗୀୟ ହାଜତରେ ରଖାଯାଇଛି। ଶ୍ରୀ ଚିଦାମ୍ବରମ୍ ଅର୍ଥମନ୍ତ୍ରୀ ଥିଲାବେଳେ ୨୦୦୭ ମସିହାରେ ଆଇଏନ୍ଏକ୍ସ ମିଡିଆ
କମ୍ପାନୀକୁ ୩୦୫ କୋଟି ବିଦେଶୀ ପାଣ୍ଠି ଗ୍ରହଣ କ୍ଷେତ୍ରରେ ବିଦେଶୀ ପୁଞ୍ଜିନିବେଶ ବିକାଶ ବୋର୍ଡ଼ ପକ୍ଷରୁ ଦିଆଯାଇଥିବା ଅନୁମତି କ୍ଷେତ୍ରରେ ହେରଫେର୍ ହୋଇଥିବା ଅଭିଯୋଗକୁ ନେଇ ୨୦୧୭ ମେ ୧୫ ତାରିଖରେ ସିବିଆଇ ଏତଲା ରୁଜ୍ଜୁ କରିଥିଲା। ଏହାପରେ ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ ୨୦୧୭ ମସିହାରେ କଳାଧନ ବୈଧ ମାମଲା ରୁଜ୍ଜୁ କରାଯାଇଥିଲା।
