ଜାଣନ୍ତୁ; ଭାରତର କେଉଁ ସବୁ ସ୍ଥାନରେ ଧୁମ୍ଧାମରେ ପାଳନ କରାଯାଏ ଖ୍ରୀଷ୍ଟମାସ
ଖ୍ରୀଷ୍ଟମାସ ଉତ୍ସବ କେବଳ ଯେ ବିଦେଶରେ ଧୁମଧାମରେ ପାଳନ ହୁଏ ତାହା ନୁହେଁ, ଭାରତରେ ମଧ୍ୟ ଅନେକ ଏଭଳି ସହର ରିହିଛି ଯେଉଁଠାରେ ଖ୍ରୀଷ୍ଟମାସ ବହୁ ଆଡମ୍ବର ସହ ପାଳନ କରାଯାଏ । ଯଦି ଆପଣ ଖ୍ରୀଷ୍ଟମାସ ଛୁଟି କାଟିବାକୁ କିଛି ସହର ଖୋଜୁଛନ୍ତି ତେବେ ଭାରତର ଏହି ସବୁ ସହରକୁ ଆପଣ ବାଛିପାରିବେ । ତେବେ ଆସନ୍ତୁ ଜାଣିବା ଭାରତର ଏହି ୪ଟି ସହର ଯେଉଁ ଖ୍ରୀଷ୍ଟମାସ ବଡ ଧୁମଧାମରେ ପାଳନ କରାଯାଏ ।
କୋଲକତା: ୧୯୧୧ ପର୍ଯ୍ୟନ୍ତ ବ୍ରିଟିଶ ସରକାରଙ୍କ ରାଜଧାନୀ ଥିବା(କଲିକତା) କୋଲକତା । ଏହି କାରଣରୁ ସେଠାରେ ଖ୍ରୀଷ୍ଟମାସକୁ ଧୁମଧାମରେ ପାଳନ କରାଯାଉଥିଲା । ଏବେ ମଧ୍ୟ ଖ୍ରୀଷ୍ଟମାସକୁ ନେଇ ସହରବାସୀ ବହୁତ ଉତ୍ସାହିତ ରହିଥାଆନ୍ତି । ଏଠାରେ ବସବାସ କରୁଥିବା ଶ୍ୱେତାଙ୍ଗ ଖ୍ରୀଷ୍ଟିୟାନ ଖ୍ରୀଷ୍ଟମାସକୁ ବଡ ଆଡମ୍ବର ସହ ପାଳନ କରିଥାଆନ୍ତି । ଯଦି ଆପଣ ଚଳିତବର୍ଷ ଖ୍ରୀଷ୍ଟମାସ ଉତ୍ସବ ପାଳନ କରିବାକୁ ଚାହଁନ୍ତି, ତେବେ କୋଲକତାକୁ ବାଛିପାରିବେ । ଏଠାରେ କ୍ୟାଥୋଲିକ ଚର୍ଚ୍ଚରେ ପ୍ରାର୍ଥନା କରିବା ସହ ପାର୍କରେ ବୁଲି ପାରିବେ । ଏହା ସହ ଷ୍ଟ୍ରିଟ୍ ଫୁଡର ମଜା ମଧ୍ୟ ନେଇ ପାରିବେ ।
କୋଚ୍ଚି: କୋଚ୍ଚିରେ ଖ୍ରୀଷ୍ଟିୟାନଙ୍କ ସଂଖ୍ୟା ଅଧିକ । ଏହି କାରଣରୁ ସେଠାରେ କେତେକ ପୁରାତନ ଚର୍ଚ୍ଚ ଦେଖିବାକୁ ମିଳେ । ଖ୍ରୀଷ୍ଟମାସ ଅବସରରେ ସେଠାକାର ଗଳିକନ୍ଦିରେ ଖ୍ରୀଷ୍ଟମାସ ଟ୍ରି ଏବଂ ବଡ ବଡ ଷ୍ଟାର ବା ତାରକାରେ ସଜାଯାଇଥିବା ଦେଖିବାକୁ ମିଳେ । ଷୋଡଶ ଶତାବ୍ଦୀରେ ପ୍ରର୍ତ୍ତୁଗୀଜଙ୍କ ଦ୍ବାରା ନିର୍ମାଣ କରାଯାଇ ଥିବା ସେଣ୍ଟ ଫ୍ରାନ୍ସିସ ଚର୍ଚ୍ଚ ଭାରତର ସବୁଠୁଁ ପୁରାତନ ୟୁରୋପିୟନ ଚର୍ଚ୍ଚ ।
ଗୋଆ: ଗୋଆ ପାର୍ଟି ହବ୍ ନାମରେ ବିଶ୍ବରେ ପରିଚିତ । ଖ୍ରୀଷ୍ଟମାସ ଅବସରରେ ଏହାର ଦୃଶ୍ୟ ଅତୀବ ମନୋରମ । ସମୁଦ୍ର ତଟ ବା ସି ବିଚ୍ ରୁ ଆରମ୍ଭ କରି ନାଇଟ୍ କ୍ଳବ୍ ପର୍ଯ୍ୟନ୍ତ ସବୁଠାରେ ଲୋକଙ୍କ ଭିଡ ଜମିଥାଏ । ଘରଠୁଁ ଆରମ୍ଭ କରି ବେକରୀ ଓ ରେଷ୍ଟୁରାଣ୍ଟ ପର୍ଯ୍ୟନ୍ତ ସବୁଠାରେ ପାମ୍ପରିକ ଖାଦ୍ୟର ଆସର ଜମିଥାଏ । ଏହା ବ୍ୟତୀତ ସ୍ଥାନୀୟ ଚର୍ଚ୍ଚ ଗୁଡିକକୁ ମଧ୍ୟ ବହୁତ ସୁନ୍ଦର ଭାବରେ ସଜା ଯାଇଥାଏ ।
ଶିମଲା: ଯଦି ଆପଣ ନିଜ ବଜେଟରେ ରହି ବରଫର ପାହଡ ମଧ୍ୟରେ ଖ୍ରୀଷ୍ଟମାସ ଉତ୍ସବ ପାଳିବାକୁ ଚାହୁଁଛନ୍ତି ତେବେ ଶିମଲା ଆପଣଙ୍କ ପାଇଁ ପ୍ରକୃଷ୍ଟ ସ୍ଥାନ ହୋଇପାରେ । ଶିମଲା ରୋମଣ୍ଟିକ ଡେଷ୍ଟିନେଶନ ଭାବରେ ପ୍ରସିଦ୍ଧ । ଏଠାରେ ବରଫର ଚାଦରରେ ଢାଙ୍କି ହୋଇଥିବା ପାହଡକୁ କାଳକା-ଶିମଲା ଟୟ ଟ୍ରେନରେ ବୁଲିବାର ମଜା ନିଆରା ।
ଆଲେଖ୍ୟ: ବୈଜୟନ୍ତୀ ନାୟକ