ପ୍ରତିବର୍ଷ ଅକ୍ଟୋବର ୧୦ ତାରିଖରେ ତାଇୱାନ (ରିପବ୍ଲିକ୍ ଅଫ୍ ଚାଇନା) ନିଜର ଜାତୀୟ ଦିବସ ପାଳନ କରିଥାଏ । ପ୍ରତିବର୍ଷ ଏହା ପାଳନ ହୁଏ, କିନ୍ତୁ ଏହା ଭାରତ ପାଇଁ କୌଣସି ଗୁରୁତ୍ଵ ବହନ କରେ ନାହିଁ । ମାତ୍ର ପ୍ରଥମଥର ପାଇଁ ତାଇୱାନ ନିଜ ଜାତୀୟ ଦିବସରେ ଭାରତ ପକ୍ଷ ନେଇ ଲାଦାଖ ପ୍ରସଙ୍ଗରେ ଚୀନକୁ ନିଶାଣ କରିବା, ଭାରତୀୟମାନଙ୍କୁ ଶୁଭେଚ୍ଛା ଜଣାଇବା ଓ ନମସ୍ତେ କହିବା ଚୀନକୁ ବିଚଳିତ କରିଛି । ପ୍ରତ୍ୟେକ ଭାରତୀୟଙ୍କୁ ତାଇୱାନ ଉପରାଷ୍ଟ୍ରପତି ଲାଇ ଚିଙ୍ଗ ଟି ନମସ୍କାର ଜଣାଇବା ସହ ତାଇୱାନ ପ୍ରତି ଭାରତୀୟମାନଙ୍କ ଶୁଭେଚ୍ଛା ନିମନ୍ତେ ଧନ୍ୟବାଦ ଜଣାଇଛନ୍ତି । କେବଳ ସେତିକି ନୁହେଁ ତାଇୱାନ ବୈଦେଶିକ ମନ୍ତ୍ରଣାଳୟ ଭାରତୀୟମାନଙ୍କ ଉଦ୍ଦେଶ୍ୟରେ ଟ୍ବିଟ୍ କରି ଆପଣଙ୍କ ସହଯୋଗରେ ଆମେ ମିଳିତ ଭାବରେ ଯେ କୌଣସି ଆହ୍ବାନକୁ ମୁକାବିଲା କରିପାରିବା ବୋଲି କହିଛନ୍ତି । ଏହା ସହ ଭାରତ ଓ ପ୍ରଶାନ୍ତ ମହାସାଗରରେ ଭାରତ ଓ ତାଇୱାନ ମଧ୍ୟରେ ନୌସେନା ଭାଗିଦାରୀକୁ ନେଇ ମଧ୍ୟ ପ୍ରଶଂସା କରିଥିଲେ ।
Proud to see our flag fly high and be recognized all over the world. We thank the people from so many countries who today expressed congratulations and support. Especially our Indian friends. Namaste!#TaiwanNationalDay #JaiHind #MilkTeaAlliance pic.twitter.com/cOllMWJdtG
— 賴清德Lai Ching-te (@ChingteLai) October 10, 2020
ତାଇୱାନର ଏହି ଭାରତ ପ୍ରେମ ଚୀନକୁ କେବଳ ବିଚଳିତ କରିନାହିଁ, ଭୟଭୀତ ମଧ୍ୟ କରିଛି । ଏଥିନେଇ ଚୀନ ତୀବ୍ର ପ୍ରତିକ୍ରିୟା ପ୍ରକାଶ କରିଛି । ପ୍ରଥମେ ନୂଆଦିଲ୍ଲୀରେ ଥିବା ଚୀନ୍ ଦୂତାବାସ ଦୁଇ ଦିନ ପୂର୍ବରୁ ତାଇୱାନକୁ ପୃଥକ ଦେଶ ଭାବରେ ପ୍ରକାଶ କରିଥିବାରୁ ଭାରତୀୟ ଗଣମାଧ୍ୟମକୁ ଚେତାବନୀ ଦେଇଥିଲେ । ଏହା ଚୀନ ବିରୋଧୀ କାର୍ଯ୍ୟକଳାପ ବୋଲି ଦୂତାବାସ ପକ୍ଷରୁ କୁହାଯାଇଛି । ସେହିପରି ଶୁକ୍ରବାର ଚୀନ ଦୂତାବାସ ତାଇୱାନର ଜାତୀୟ ଦିବସରେ କୌଣସି ମନ୍ତବ୍ୟ ନ ଦେବାକୁ ଭାରତୀୟ ଗଣମାଧ୍ୟମକୁ ଚେତାଇ ଦେଇଥିଲା ।
ଅନ୍ୟପକ୍ଷରେ ଚୀନ ସରକାରଙ୍କ ଦ୍ବାରା ପରିଚାଳିତ ସମ୍ବାଦପତ୍ର ଗ୍ଲୋବାଲ ଟାଇମ୍ସରେ ଭାରତକୁ ପରୋକ୍ଷରେ ଚେତାବନୀ ଦିଆଯାଇ ତାଇୱାନକୁ ସମର୍ଥନ କରିବା ନିଆଁ ସହ ଖେଳ ବୋଲି ବର୍ଣ୍ଣନା କରିଛି । ତାଇୱାନ ଜାତୀୟ ଦିବସରେ ନୂଆଦିଲ୍ଲୀରେ ଚୀନ୍ ଦୂତାବାସ ସମ୍ମୁଖରେ ପୋଷ୍ଟର ଲଗାଯିବା ପ୍ରସଙ୍ଗରେ ଗ୍ଲୋବାଲ ଟାଇମ୍ସ ଭାରତୀୟ ଜନତା ପାର୍ଟିର ନେତାଙ୍କୁ ପରୋକ୍ଷରେ ଧମକ ଦେଇଛି । ଭାରତୀୟ ଜନତା ପାର୍ଟିର ନେତା ଚୀନ୍ ଦୂତାବାସ ସମ୍ମୁଖରେ ତାଇୱାନ ଦିବସରେ ଯେଉଁ ପୋଷ୍ଟର ଲଗାଇଛନ୍ତି ତାହା ନିଆଁ ସହିତ ଖେଳିବା ପରି ଏବଂ ଏହା ଦୁଇ ଦେଶ ମଧ୍ୟରେ ଥିବା ତିକ୍ତ ସମ୍ପର୍କକୁ ଆହୁରି ଖରାପ କରିବ ବୋଲି ଗ୍ଲୋବାଲ ଟାଇମ୍ସ ପକ୍ଷରୁ କୁହାଯାଇଛି ।
ତେବେ ଏହି ସମଗ୍ର ପ୍ରସଙ୍ଗରେ ଭାରତ ସରକାର ନୀରବ ରହିଛନ୍ତି। ଏହା ହେଉଛି ଭାରତ ସରକାରଙ୍କ ସରକାରୀ ସ୍ଥିତି, ଏହା ଚୀନ୍ ନୀତି ଅନୁସରଣ କରୁଛି। ଏହି କାରଣ ହେଉଛି ଯେତେବେଳେ ତାଇୱାନର ରାଷ୍ଟ୍ରପତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ତାଙ୍କ ଜନ୍ମଦିନରେ ଅଭିନନ୍ଦନ ଜଣାଇଥିଲେ, ସେତେବେଳେ ପ୍ରଧାନମନ୍ତ୍ରୀ ତାଙ୍କୁ ଆନୁଷ୍ଠାନିକ ଭାବେ ପ୍ରତିକ୍ରିୟା ଦେଇନଥିଲେ।
