ଅନଲାଇନ୍ ବିଲଡିଂ ପ୍ଲାନ୍ ‘ସୁଯୋଗ’ ବ୍ୟବସ୍ଥାର ଶୁଭାରମ୍ଭ : ଏଣିକି ୪୮ ଘଣ୍ଟାରେ ‘ଜି+୨’ କୋଠାର ଅନୁମୋଦନ

ଭୁବନେଶ୍ୱର : ସହରାଞ୍ଚଳର ଲୋକେ ଆଉ ସର୍ବନିମ୍ନ ଘର ଖଣ୍ଡିଏ ନିର୍ମାଣ ପାଇଁ ଏହାର ଅନୁମୋଦନ ଲାଗି ସରକାରୀ କାର୍ଯ୍ୟାଳୟକୁ ଦୌଡ଼ିବାକୁ ପଡ଼ିବନାହିଁ। ଏକମହଲାଠାରୁ ଆରମ୍ଭ କରି ଭୂତଳ ଯୁକ୍ତ ଦୁଇମହଲା(ଜି+୨) ପର୍ଯ୍ୟନ୍ତ କୋଠାର ଅନୁମୋଦନ ଲୋକେ ଏଣିକି ଘରେ ବସି ପାଇପାରିବେ। ଏଥିପାଇଁ ଆବଶ୍ୟକୀୟ କାଗଜପତ୍ର ସହିତ ସରକାରୀ ଦେୟ ଅନଲାଇନ ଜରିଆରେ ଦେଲେ ୪୮ ଘଣ୍ଟାରେ କୋଠାର ଅନୁମୋଦନ ମିଳିବ ବୋଲି ପଞ୍ଚାୟତିରାଜ, ଆଇନ, ଗୃହ ଓ ନଗର ଉନ୍ନୟନ ବିଭାଗ ମନ୍ତ୍ରୀ ପ୍ରତାପ ଜେନା କହିଛନ୍ତି।
ଶୁକ୍ରବାର ଅନଲାଇନ୍ ବିଲଡିଂ ପ୍ଲାନ୍ ଅନୁମୋଦନ ବ୍ୟବସ୍ଥା ‘ସୁଯୋଗ’ର ଶୁଭାରମ୍ଭ କରି ମନ୍ତ୍ରୀ ଶ୍ରୀ ଜେନା କହିଥିଲେ ଯେ, ରାଜ୍ୟ ସରକାର ଏବେ ୫-ଟି ଆଧାରରେ ନୂତନ ଜ୍ଞାନକୌଶଳର ପ୍ରୟୋଗ କରି କମ୍ ସମୟ ମଧ୍ୟରେ ସ୍ବଚ୍ଛତା ଓ ସାଧୂତା ଆଧାରରେ ଲୋକେ କିଭଳି ସବୁ ପ୍ରକାର ସେବା ଗୋଟିଏ ଛାତତଳେ ପାଇପାରିବେ ତାକୁ ବିଭାଗ ଗୁରୁତ୍ବ ଦେଉଛି। ଏହାକୁ ନେଇ ବିଭାଗ ପକ୍ଷରୁ ଅନଲାଇନ ଜରିଆରେ କୋଠା ଅନୁମୋଦନ ଯୋଜନା ହାତକୁ ନିଆଯାଇଛି। ରାଜ୍ୟର ୧୧୪ଟି ସହରାଞ୍ଚଳରେ ବସବାସ କରୁଥିବା ନାଗରିକମାନଙ୍କୁ ଅତ୍ୟାଧୁନିକ ଆଇସିଟି ସୁବିଧାଯୁକ୍ତ ସେବା ଯୋଗାଇବା ପାଇଁ ଏହି ପରିବର୍ତ୍ତନଶୀଳ ପଦକ୍ଷେପ ଉଦ୍ଦିଷ୍ଟ। ନିର୍ମାଣ ଯୋଜନା ପ୍ରୟୋଗ ଏବଂ ବ୍ୟବସାୟ କରିବାର ସହଜତାକୁ ନିଶ୍ଚିତ କରିବା ଇଜ୍‍ ଅଫ୍‍ ଡୁଇଙ୍ଗ ବିଜିନେସ୍‍ ଅନ୍ତର୍ଭୁକ୍ତ କରି ସମଗ୍ର ବିଲଡିଂ ପ୍ଲାନ୍ ଅନୁମୋଦନ ପ୍ରକ୍ରିୟା ପାଇଁ ଅନ୍‍ ଲାଇନ୍‍ ବିଲ୍ଡିଂ ପ୍ଲାନ ଅନୁମୋଦନ ପଦ୍ଧତି (ଓବିପିଏଏସ୍‍)। ସ୍ୱୟଂଚାଳିତ କୋଠାବାଡି ନକ୍ସାର ଅନୁମତି, ଦେୟ ପ୍ରଦାନ, ବିଲ୍ଡିଂ ଅନୁମତି ଆବେଦନ ପ୍ରକ୍ରିୟା, ପ୍ଲିନ୍ଥ ଠାରୁ ଛାତ ଯାଏ ତଦାରଖ ପ୍ରମାଣପତ୍ର ଆଦି ଏହାଦ୍ୱାରା ହୋଇପାରିବ। ଓଡିଏ ଅଧିନିୟମ- ୧୯୮୨ ଅନୁଯାୟୀ ଓବିପିଏଏସ୍‍ ନାଗରିକ, ସ୍ଥପତି ଏବଂ ବୈଷୟିକ ବ୍ୟକ୍ତିଙ୍କ ଆବଶ୍ୟକତାକୁ ପୂରଣ କରାଯିବ। ବିଲଡିଂ ଅନୁମତି ଏବଂ ସାର୍ଟିଫିକେଟ୍ ପ୍ରୟୋଗଗୁଡ଼ିକର ଅନଲାଇନ୍ ଅନୁମୋଦନ ସହିତ ସ୍ୱୟଂଚାଳିତ ଫି ହିସାବ ଏବଂ ଆଦାୟ ଏବଂ ଏକ ଉପଭୋକ୍ତା-ଅନୁକୂଳ ବ୍ୟବସ୍ଥା ସହିତ ଅନଲାଇନ୍ ଦେୟକୁ ସହଜ କରିବ। ଶାସନ ଉତ୍ତମ ସେବା ଯୋଗାଇବା କ୍ଷେତ୍ରରେ ବୈଷୟିକ ଜ୍ଞାନକୌଶଳ ବ୍ୟବହାର କରି ଲୋକଙ୍କ ଆବଶ୍ୟକତା ପୂରଣ କରିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦୃଷ୍ଟିକୁ ନେଇ ବିଭାଗ ଏହି ପଦକ୍ଷେପ ନେଇଛି ବୋଲି ଶ୍ରୀ ଜେନା କହିଛନ୍ତି। ବିଭାଗୀୟ ପ୍ରମୁଖ ସଚିବ ଜି ମାଥିଭାଥନନ୍ ସ୍ୱାଗତ ଭାଷଣରେ କହିଥିଲେ ଯେ ସୁଯୋଗ ଅଧୀନରେ ଓବିପିଏଏସ୍‍ ଆନୁଷ୍ଠାନିକ ଉନ୍ମୋଚନ ସହିତ ଓଡ଼ିଶା ସରକାର ଏହାକୁ ନାଗରିକ କୈନ୍ଦ୍ରିକରେ ପରିଣତ କରିବା ପାଇଁ ପ୍ରତିବଦ୍ଧତାକୁ ଦୋହରାଇଛନ୍ତି। ଗୃହ ଏବଂ ନଗର ଉନ୍ନୟନ ବିଭାଗ ଏହାର ସମସ୍ତ ସହରୀ ସେବାକୁ ଖୁବ୍ ଶୀଘ୍ର ସୁଯୋଗ ପ୍ଲାଟଫର୍ମକୁ ସ୍ଥାନାନ୍ତର କରିବ ବୋଲି ପ୍ରମୁଖ ସଚିବ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ ଶର୍ମା ଓ ପୌର ନିର୍ଦେଶକ ସଂଗ୍ରାମଜିତ ନାୟକ ପ୍ରମୁଖ ଉପସ୍ଥିତ ଥିଲେ।