ଲକ୍ଷ୍ନୌ : ଉତ୍ତରପ୍ରଦେଶ ବୁଲନ୍ଦସହର ହିଂସାରେ ପ୍ରାଣ ହରାଇଥିବା ପୁଲିସ ଇନ୍ସପେକ୍ଟର ସୁବୋଧ କୁମାର ସିଂହଙ୍କ ମୋବାଇଲ ଫୋନକୁ ରବିବାର ମୁଖ୍ୟ ଅଭିଯୁକ୍ତ ପ୍ରଶାନ୍ତ ନାଟ୍ଟଙ୍କ ଘରୁ ଜବତ କରାଯାଇଛି। ଏସପି ଅତୁଲ ଶ୍ରୀବାସ୍ତବ କହିଛନ୍ତି ଯେ ମୋବାଇଲ ଫୋନର ଅବସ୍ଥିତି ବାବଦରେ ଆମକୁ ସୂଚନା ମିଳିଛି। ଏବେ ସୁବୋଧ ସିଂହଙ୍କ ପିସ୍ତଲକୁ ଠାବ କରିବା ଲାଗି ଚେଷ୍ଟା ଚାଲିଛି। ଡିସେମ୍ବର ୩ରେ ବୁଲନ୍ଦସହର ମାହବ ଗ୍ରାମରେ ହିଂସାକାଣ୍ଡ ଘଟି ସୁବୋଧ ସିଂହଙ୍କ ମୃତ୍ୟୁ ହୋଇଥିଲା। ଗୋ ହତ୍ୟାକୁ ବିରୋଧ କରି ସ୍ଥାନୀୟ ଲୋକେ ବିକ୍ଷୋଭ ପ୍ରଦର୍ଶନ କରିଥିଲେ। ବିକ୍ଷୋଭକୁ ନିୟନ୍ତ୍ରଣ ବେଳେ ଜଣେ ବିକ୍ଷୋଭକାରୀ ଗୁଳି ଚଳାଇବାରୁ ଇନ୍ସପେକ୍ଟର ସୁବୋଧ ସିଂହ ଓ ଅନ୍ୟ ଜଣେ ସ୍ଥାନୀୟ ଯୁବକ ପ୍ରାଣ ହରାଇଥିଲେ। ଏହି ଘଟଣାରେ ମୋଟ ୩୫ଜଣଙ୍କୁ ଗିରଫ କରାଯାଇଛି। ତେବେ ପ୍ରଶାନ୍ତଙ୍କୁ ଘଟଣାର ମୁଖ୍ୟ ଅଭିଯୁକ୍ତ ଭାବେ ଚିହ୍ନଟ କରାଯାଇଛି। ତାଙ୍କୁ ଡିସେମ୍ବର ୨୭ରେ ଗିରଫ କରାଯାଇଥିଲା। ଉତ୍ତରପ୍ରଦେଶ ସରକାର ତିନି ଅଭିଯୁକ୍ତଙ୍କ ବିରୋଧରେ ଜାତୀୟ ସୁରକ୍ଷା ଆଇନ (ଏନଏସଏ) ଅନୁଯାୟୀ ମାମଲା ରୁଜୁ କରିଛନ୍ତି।
