ବ୍ରଜରାଜନଗର: ବ୍ରଜରାଜନଗର ସହରର ମୁଖ୍ୟ ରାସ୍ତାରେ ହୋଇଥିବା ଖାଲ ଖମାକୁ ଯୋଗୁଁ ପ୍ରବଳ ଜନ ଅସନ୍ତୋଷ ଦେଖାଦେଇଛି। ଟନେଲ ରୋଡରୁ ରେଳ ଷ୍ଟେସନ ରାସ୍ତା ଅତ୍ୟନ୍ତ ବିପଦଜନକ ହୋଇ ପଡ଼ିଥିବାରୁ ଲୋକେ ସୋସିଆଲ ମିଡିଆରେ ଆଜି ନିଜର କ୍ଷୋଭ ପ୍ରକାଶ କରିଛନ୍ତି। ପୋୖର ପରିଷଦ କଲ୍ୟାଣ ମଣ୍ଡପ ସମ୍ମୁଖର ଏହି ରାସ୍ତାରେ ନିର୍ବାଚିତ ପ୍ରତିନିଧି, ପ୍ରଶାସନିକ ଅଧିକାରୀ ଯାତାୟତ କରୁଥିଲେ ହେଁ କାହାରି ନଜର ଏଥି ପ୍ରତି ପଡୁନଥିବା ଅଭିଯୋଗ ହୋଇଛି।
ଶୋଚନୀୟ ରାସ୍ତାଟି ମରଣଯନ୍ତା ପଲଟିଥିବାରୁ ଅନେକ ଛୋଟ ବଡ଼ ଦୁର୍ଘଟଣା ଘଟି ଲୋକେ ଲହୁ ଲୁହାଣ ହେଉ ଥିବା ଅଭିଯୋଗ ହେଉଛି। ବିଶେଷ କରି ରାତିରେ ଏହି ରାସ୍ତା ଅତ୍ୟନ୍ତ ବିପଦଜନ ହୋଇ ପଡିଛି। ଏହି ପରିପ୍ରେକ୍ଷୀରେ ଭବିଷ୍ୟତରେ ଏକ ବଡ ଧରଣର ଦୁର୍ଘଟଣାକୁ ଏଡାଇ ଦିଆ ଯାଇ ନ ପାରେ। ତେଣୁ କୌଣସି ଅଘଟଣ ଘଟିବା ପୂର୍ବରୁ ଏହାର ମରାମତି କରିବା ଅତ୍ୟନ୍ତ ଜରୁରୀ ବୋଲି ମତ ପ୍ରକାଶ ପାଇଛି। ସେପଟେ ସରକାର ରାଜସ୍ବ ବାବଦରେ ଶହ ଶହ କୋଟି ଟଙ୍କା ବ୍ରଜରାଜନଗର ଅଂଚଳରୁ ଆଦାୟ କରୁଥିବା ବେଳେ ଏଭଳି ସମସ୍ୟା ଦୀପ ତଳ ଅନ୍ଧାର ବୋଲି ପ୍ରତୀତ ହେଉଥିବା ବୁଦ୍ଧିଜୀବୀ ମହଲରେ ମତ ପ୍ରକାଶ ପାଉଛି। ଅନ୍ୟପଟେ ବହୁ ମାସ ଧରି ଏହି ସମସ୍ୟା ଲାଗି ରହିଥିଲେ ହେଁ ପ୍ରଶାସନ ଧ୍ୟାନ ଦେଉ ନ ଥିବାରୁ ଏକ ବଡ଼ ଧରଣର ଆନ୍ଦୋଳନ ଦାନା ବାନ୍ଧୁ ଥିବା ସୂଚନା ମିଳିଛି।
