ଦେଓଗାଁ : ପ୍ରାକୃତିକ ସୌନ୍ଦର୍ଯ୍ୟରେ ଭରିରହିଥିବା ବଲାଙ୍ଗୀର ଜିଲ୍ଲାର ଭୀମପାହାଡ଼ ପର୍ଯ୍ୟଟନ ସ୍ଥଳୀରେ ନୌବିହାର ଆରମ୍ଭ ହୋଇଛି। ତେବେ ଏହି ବିକାଶ କାର୍ଯ୍ୟର ଶ୍ରେୟକୁ ନେଇ ରାଜନୀତି ଜୋର ଧରିଛି । ବିକାଶ କାମର ଶ୍ରେୟ ପାଇଁ ବିଜେଡି ଓ କଂଗ୍ରେସ ଭିତରେ ଟଣାଓଟରା ଚାଲିଛି । ଫଳରେ ଗତ ୧୫ ଦିନ ମଧ୍ୟରେ ଏହି ଗୋଟିଏ ପ୍ରକଳ୍ପକୁ ରାଜ୍ୟର ଦୁଇ ପ୍ରମୁଖ ନେତା ଦୁଇ ଦୁଇ ଥର ନଡ଼ିଆ ଭାଙ୍ଗି ଶୁଭାରମ୍ଭ କରିବା ବିଷୟ ଦେଓଗାଁ ବ୍ଳକ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଏହି ପାହାଡ଼ର ବିକାଶ ପାଇଁ ରାଜ୍ୟ ସରକାର ପ୍ରାୟ ୫ କୋଟି ଟଙ୍କା ଯୋଗାଇ ଦେଇଛନ୍ତି, କାମ ମଧ୍ୟ ଆଗେଇ ଚାଲିଛି କିନ୍ତୁ ରାଜନୀତିରେ ପତିଆର ବୃଦ୍ଧି ପାଇଁ ବିଜେଡ଼ି ଓ କଂଗ୍ରେସ ମଧ୍ୟରେ ଟଣାଓଟରା ଚାଲିଛି ବୋଲି ଆଲୋଚନା ହେଉଛି ।
ସୂଚନାଯୋଗ୍ୟ, ଗତ ୨୫ତାରିଖରେ ସ୍ଥାନୀୟ ସରପଞ୍ଚ ,ସମିତି ସଭ୍ୟ, ଜିଲ୍ଲା ପରିଷଦ ସଭ୍ୟଙ୍କୁ ନେଇ ପୂର୍ବତନ ମନ୍ତ୍ରୀ ତଥା ବିଜେଡି ରାଜ୍ୟ ଉପସଭାପତି ଅନଙ୍ଗଉଦୟ ସିଂଦେଓ ଭିମକଟାରେ ନୌବିହାର ସେବା ଆରମ୍ଭ ହେଲା ବୋଲି ନଡିଆ ଭାଙ୍ଗିଥିଲେ । କିନ୍ତୁ ବୁଧୁବାର ଦିନ ପୁଣି ଥରେ ଏହି ନୌବିହାର ପ୍ରକଳ୍ପକୁ ପୂର୍ବତନ ମନ୍ତ୍ରୀ ତଥା ବଲାଙ୍ଗୀର ବିଧାୟକ ନରସିଂହ ମିଶ୍ର ଜିଲ୍ଲା ଜଙ୍ଗଲ ଅଧିକାରୀଙ୍କ ଉପସ୍ଥିତରେ ଫିତାକାଟି ଉଦଘାଟନ କରିଛନ୍ତି । ଏହି ପର୍ଯ୍ୟଟନ ସ୍ଥଳୀରେ ହରିଣ ପାର୍କ ସହ ଏକ ସୁନ୍ଦର ପାର୍କ ନିର୍ମାଣ କରାଯିବ ବୋଲି ବିଧାୟକ କହିବା ସହ ଏହା କାହାର ପୈତୃକ ସମ୍ପତ୍ତି ନୁହେଁ ଯେ, ଯିଏ ଚାହିଁବ ଏହାକୁ ଜାବୁଡ଼ି ରଖିବ ବୋଲି କହିଛନ୍ତି । ଏପରି କି ବିଧାୟକ ଓ ଡିଏଫଓ ଡଙ୍ଗାରେ ବସି ନୌକା ଚାଳନା କରିଥିବା ମଧ୍ୟ ଦେଖିବାକୁ ମିଳିଥିଲା । ଏନେଇ ବଲାଙ୍ଗୀର ଜଙ୍ଗଲ ଅଧିକାରୀ ନୀତିନ କୁମାରଙ୍କୁ ପଚାରିବାରୁ ପୂର୍ବରୁ ହୋଇଥିବା ଶୁଭାରମ୍ଭ ବେଆଇନ ବୋଲି ସେ କହିଥିଲେ। ସରକାରୀ ଭାବେ ୬ ତାରିଖରେ ଏହି ନୌବିହାର ସେବା ଆରମ୍ଭ ହେଲା ଓ ୫୦ ଟଙ୍କାର ଟିକଟ କାଟି ପର୍ଯ୍ୟଟକ ନୌବିହାର କରି ପାରିବେ ବୋଲି କହିଛନ୍ତି । ଅନ୍ୟପକ୍ଷରେ ସରକାରୀ କାର୍ଯ୍ୟକ୍ରମକୁ ସ୍ଥାନୀୟ ଜିଲ୍ଲା ପରିଷଦ ସଭ୍ୟ, ସରପଞ୍ଚ, ସମିତି ସଭ୍ୟଙ୍କୁ ଜଙ୍ଗଲ ବିଭାଗ ନିମନ୍ତ୍ରଣ କରିନଥିବାରୁ ନିର୍ବଚିତ ପ୍ରତିନିଧି ମାନେ ଅସନ୍ତୋଷ ପ୍ରକାଶ କରିଛନ୍ତି ।
୬୩ ଗୁମ୍ଫା ଥିବା ଭୀମକପାହାଡ଼କୁ ଗତ ୨୦୧୫ ମସିହାରେ ରାଜ୍ୟ ସରକାର ପର୍ଯ୍ୟଟନ ସ୍ଥଳୀର ମାନ୍ୟତା ଦେଲା ପରେ କୋଟି କୋଟି ଟଙ୍କା ଖର୍ଚ୍ଚ କରି ପାହାଡ଼ର ଚାରି ଆଡ଼େ ସୌନ୍ଦର୍ଯ୍ୟ କରଣ କାମ କରାଯାଉଛି । ଏଭଳି କାମ ଆଗେଇଲେ ଅଞ୍ଚଳର ଅର୍ଥିକ ବିକାଶ ହେବା ସହ ପର୍ଯ୍ୟଟନ ସ୍ଥଳୀର ଗରୁତ୍ବ ବଢିବ ବୋଲି ମତ ପ୍ରକାଶ ପାଉଛି।
