ପିପିଲି : ଭୁବନେଶ୍ୱର-ପୁରୀ ଜାତୀୟ ରାଜପଥର ପିପିଲି ଟୋଲଗେଟ୍ ଛକ ନିକଟରେ ଗୁରୁବାର ଏକ ଟ୍ରକ ଧକ୍କାରେ ଜଣେ ବାଇକ ଚାଳକଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ମୃତ ବାଇକ ଚାଳକଙ୍କ ପରିଚୟ ଏଯାବତ୍ ଜଣାପଡିନଥିବା ବେଳେ ତାଙ୍କ ମୋବାଇଲ୍ ସିମକାର୍ଡକୁ ନେଇ ପରିଚୟ ଜାଣିବା ପାଇଁ ପୁଲିସ ଉଦ୍ୟମ ଚଳାଇଛି। ତେବେ ସେ ଜଣେ ଆଇନଜୀବୀ ବୋଲି ପ୍ରାଥମିକ ସୂତ୍ରରୁ ଜଣାପଡ଼ିଛି। ପୁଲିସ ମୃତଦେହକୁ ଜବତ କରିବା ସହ ଦୁର୍ଘଟଣା ଘଟାଇଥିବା ଟ୍ରକ୍ ଡ୍ରାଇଭରକୁ ଅଟକ ରଖି ଘଟଣାର ତଦନ୍ତ ଚଳାଇଛି।
ସୂଚନା ଅନୁସାରେ, ଦିନ ପ୍ରାୟ ୧୧ଟା ୫୦ମିନିଟ୍ ସମୟରେ ଭୁବନେଶ୍ୱର ଅଭିମୁଖେ ଜଣେ ବ୍ୟକ୍ତି ବାଇକ୍ରେ ଯାଉଥିବା ବେଳେ ପଛରୁ ଦ୍ରୁତଗତିରେ ଯାଉଥିବା ଏକ ଟ୍ରକ୍ ଉକ୍ତ ବାଇକକୁ ଧକ୍କା ଦେଇଥିଲା। ବାଇକ ଚାଳକ ତଳେ ପଡ଼ିଯିବା ପରେ ତାଙ୍କ ମୁଣ୍ଡ ଉପରେ ଟ୍ରକର ଚକା ଚଢିଯାଇଥିଲା। ଫଳରେ ସେ ପିନ୍ଧିଥିବା ହେଲମେଟ୍ଟି ଭାଙ୍ଗି ଚୁରମାର ହୋଇଯାଇଥିବା ବେଳେ ମୁଣ୍ଡର ଖପୁରୀ ଓ ମାଂସ ପ୍ରାୟ ୧୫ଫୁଟ ପର୍ଯ୍ୟନ୍ତ ଛିଟିକ ରାସ୍ତା ଉପରେ ଏଣେତେଣେ ପଡ଼ିଥିବା ପରିଲକ୍ଷିତ ହୋଇଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଛି। ଖବର ପାଇ ପିପିଲି ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଛି। ଦୁର୍ଘଟଣା ପରେ ଟ୍ରକଟି ଦୃତଗତିରେ ସେଠାରୁ ଖସି ପଳାଇବାକୁ ଉଦ୍ୟମ କରୁଥିବା ବେଳେ ପିପିଲି ଟୋଲଗେଟ୍ ଠାରେ ପୁଲିସ ତାକୁ ଅଟକାଇଥିଲା।
