କଟକ: ଆସନ୍ତା ୯ରେ ବାରବାଟୀ ଷ୍ଟାଡିୟମ୍ରେ ଭାରତ-ଇଂଲଣ୍ଡ ଦିନିକିଆ ମ୍ୟାଚ୍ ଖେଳାଯିବ। ଏଥିପାଇଁ ଓଡ଼ିଶା କ୍ରିକେଟ ଆସୋସିଏସନ (ଓସିଏ) ସହ ଅନୁବନ୍ଧିତ ସଂସ୍ଥା ବା ୟୁନିଟଗୁଡ଼ିକୁ ପାସ୍ ବଣ୍ଟନ କରିବା ସହ ଟିକଟ ବିକ୍ରି କରିଛି। ଓସିଏ ସମ୍ମିଳନୀ କକ୍ଷରେ ଟିକଟ ବିକ୍ରି ନିମନ୍ତେ ଭାରତୀୟ ଷ୍ଟେଟ ବ୍ୟାଙ୍କ ଅଫ(ଏସ୍ବିଆଇ) ପକ୍ଷରୁ ଆୟୋଜନ କରା ଯାଇଥିଲା। ଓସିଏ ଅନୁବନ୍ଧିତ ଜିଲାମାନଙ୍କୁ ୧୪୫ଟି ଲେଖାଏଁ ଏବଂ କ୍ଲବ୍ ଓ ସଂସ୍ଥାଙ୍କୁ ୧୦୦ଟି ଲେଖାଏଁ ଟିକଟ ବିକ୍ରି କରାଯାଇଛି। ଓସିଏ ସହ ଅନୁବନ୍ଧିତ ସ୍କୁଲ, କଲେଜ୍ ଓ ବିଶ୍ବବିଦ୍ୟାଳୟ ଟିକଟ କ୍ରୟ କରିଛନ୍ତି।
ଏହାସହ ଉପରୋକ୍ତ ସମସ୍ତ ଅନୁବନ୍ଧିତ ସଂସ୍ଥାମାନଙ୍କୁ ଓସିଏ ପକ୍ଷରୁ ୩୦ଟି ଲେଖାଏଁ ପାସ୍ ବଣ୍ଟନ କରା ଯାଇଥିଲା। ସକାଳ ୧୦ଟାରୁ ସନ୍ଧ୍ୟା ୬ ପର୍ଯ୍ୟନ୍ତ ଏହି ପାସ୍ ବଣ୍ଟନ ଓ ଟିକଟ ବିକ୍ରି ଚାଲିଥିଲା। ମଙ୍ଗଳବାର ମଧ୍ୟ ଅନୁବନ୍ଧିତ ୟୁନିଟ୍ମାନଙ୍କୁ ପାସ୍ ବଣ୍ଟନ କରାଯିବ ଏବଂ ଟିକଟ ବିକ୍ରି କରାଯିବ। ତେବେ ଅନୁବନ୍ଧିତ ୟୁନିଟ୍ ପାଇଁ ଥିବା କିଛି ଟିକଟ ଯଦି ବିକ୍ରି ନ ହୁଏ; ତେବେ ସେଗୁଡ଼ିକ ବିକ୍ରି ପାଇଁ ଟିକଟ କାଉଣ୍ଟରକୁ ଯିବ ବୋଲି ଓସିଏ ପକ୍ଷରୁ ସୂଚନା ଦିଆଯାଇଛି। ରବିବାର ଓସିଏର ସଦସ୍ୟ ପୂର୍ବତନ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତି ମଧ୍ୟ ଟିକଟ କିଣିଥିଲେ। ଓସିଏର ମୋଟ ୭୦ଟି ଅନୁବନ୍ଧିତ ସଂସ୍ଥା ଏବଂ ୩ ଜଣ ଆନ୍ତର୍ଜାତିକ କ୍ରିକେଟରଙ୍କ ପାଇଁ ଏହି ପାସ୍ ବଣ୍ଟନ ସହ ଟିକଟ ବିକ୍ରି ବ୍ୟବସ୍ଥା କରା ଯାଇଥିଲା।
Comments are closed.