କାବୁଲ / ୱାଶିଂଟନ: ଆମେରିକା ପକ୍ଷରୁ ରବିବାର ଅପରାହ୍ଣରେ କାବୁଲରେ ହୋଇଥିବା ଡ୍ରୋନ ଆକ୍ରମଣରେ ଅନ୍ୟୂନ ୧୦ ଜଣଙ୍କର ମୃତ୍ୟୁ ଘଟିଛି। ସେମାନଙ୍କ ମଧ୍ୟରେ କିଛି ଶିଶୁ ମଧ୍ୟ ରହିଥିବା ତୋଲୋ ନ୍ୟୁଜ ପକ୍ଷରୁ କୁହାଯାଇଛି। ଆକ୍ରମଣ ପରେ ଆମେରିକୀୟ ଅଧିକାରୀଙ୍କ ପକ୍ଷରୁ ସୂଚନା ଦିଆଯାଇଥିଲା ଯେ ବିସ୍ଫୋରକ ବୋଝେଇ ଏକ କାରକୁ ଲକ୍ଷ୍ୟ କରି ଏହି ଆକ୍ରମଣ କରାଯାଇଥିଲା। ଖବର ସରବରାହ ସଂସ୍ଥା ସିଏନଏନ ଏହା ପୂର୍ବରୁ କହିଥିଲା, ଆମେରିକା ଆକ୍ରମଣରେ ଗୋଟିଏ ପରିବାରର ୬ ପିଲାଙ୍କ ସମେତ ୯ ଜଣ ସଦସ୍ୟଙ୍କର ମୃତ୍ୟୁ ଘଟିଛି। କାବୁଲର ଜନଗହଳି ଅଞ୍ଚଳରେ ଏହି ଆକାଶି ଆକ୍ରମଣ କରାଯାଇଥିଲା। ତେବେ ଆମେରିକାର ଆକ୍ରମଣ ଅଥବା ତଦ୍ଜନିତ ବିସ୍ଫୋରକ ଭର୍ତ୍ତି କାରରେ ବିସ୍ଫୋରଣ ଯୋଗୁ ଏତେ ସଂଖ୍ୟାରେ ଲୋକଙ୍କ ପ୍ରାଣହାନି ଘଟିଛି, ତାହା ସଠିକ ଜଣାପଡିନାହିଁ। ତେବେ ଏଥିରେ ନିରୀହ ଲୋକଙ୍କ ଜୀବନହାନି ପାଇଁ ଆମେରିକୀୟ ଅଧିକାରୀ ଦୁଃଖ ପ୍ରକାଶ କରିଛନ୍ତି। ତାଲିବାନ ପକ୍ଷରୁ କୁହାଯାଇଛି ଯେ ଆମେରିକା ଆକ୍ରମଣରେ ଧ୍ୱଂସ ପାଇଯାଇଥିବା ବିସ୍ଫୋରକ ବୋଝେଇ କାର୍ କାବୁଲ ବିମାନ ବନ୍ଦର ଅଭିମୁଖେ ଯିବାକୁ ପ୍ରସ୍ତୁତ ହେଉଥିଲା।
Comments are closed.