ଆଠଗଡ: ପ୍ରଚଣ୍ଡ ଗ୍ରୀଷ୍ମପ୍ରବାହ ଆରମ୍ଭ ନ ହେଉଣୁ ଆଠଗଡରେ ପାନୀୟଜଳ ସମସ୍ୟା ଉତ୍କଟ ରୂପ ଧାରଣ କଲାଣି। ଗ୍ରାମ୍ୟ ପାନୀୟଜଳ ବିଭାଗୀୟ ଅଧିକାରୀଙ୍କୁ ଏ ବିଷୟରେ ଗ୍ରାମବାସୀ ଅଭିଯୋଗ କଲେ ମଧ୍ୟ କିଛି ସୁଫଳ ମିଳୁନାହିଁ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଆଠଗଡ ବ୍ଲକ ଅନ୍ତର୍ଗତ ରାଧାଗୋବିନ୍ଦପୁର ପଞ୍ଚାୟତର ମାରୁତି ବିହାର ଅଞ୍ଚଳରେ। ଏହି ଅଞ୍ଚଳଟି ଏକ ଟାଙ୍ଗରା ତଥା ଜଳକ୍ଲୀଷ୍ଟ ଅଞ୍ଚଳ ଅଟେ। ଏଠାରେ ରହୁଥିବା ଅଧିବାସୀ ମାନେ ଗ୍ରାମ୍ୟ ପାନୀୟଜଳ ଯୋଗାଣ ବିଭାଗ ଦ୍ବାରା ପାଇପ୍ ଯୋଗେ ଜଳ ଯୋଗାଣ ଉପରେ ସମ୍ପୂର୍ଣ୍ଣ ନିର୍ଭରଶୀଳ। ଏଠାରେ ଦୈନିକ ଦୁଇ ଥର ଜଳ ଯୋଗାଇ ଦିଆଯାଉଥିଲା।
ମାତ୍ର ଗତ ତିନି ମାସ ହେବ ଏଠାରେ ଥରେ ମାତ୍ର ଜଳ ଯୋଗାଇ ଦିଆଯାଉଛି ଏବଂ ତାହା ପୁଣି ମାତ୍ର ଅଧଘଣ୍ଟା । ପମ୍ପ ହାଉସରୁ ଜଳ ଯୋଗାଣ ପାଇଁ ଏଠାରେ ଦୁଇଜଣ ଅପରେଟରଙ୍କ ମଧ୍ଯରୁ ମାତ୍ର ଜଣେ ଥିବାରୁ ଜଳ ଯୋଗାଣ ପାଇଁ ଏଭଳି ସମସ୍ୟା ଉପୁଜୁଛି। ଏ ବିଷୟରେ ବିଭାଗୀୟ ଅଧିକାରୀଙ୍କୁ ବାରମ୍ବାର ସ୍ଥାନୀୟ ଅଧିବାସୀମାନେ ଅଭିଯୋଗ କରିବା ପରେ ବି ସେମାନେ କୌଣସି ପଦକ୍ଷେପ ଗ୍ରହଣ ନକରିବାରୁ ଅଞ୍ଚଳବାସୀ ଉପଜିଲାପାଳଙ୍କୁ ଲିଖିତ ଅଭିଯୋଗ କରିଛନ୍ତି। ଉପଜିଲାପାଳଙ୍କ ଅନୁପସ୍ଥିତିରେ ଡେପୁଟି କଲେକ୍ଟର ଅଭିସ୍ପା ମହାନ୍ତିଙ୍କୁ ଦାବିପତ୍ର ପ୍ରଦାନ କରି ତୁରନ୍ତ ଏହାର ସମାଧାନ ପାଇଁ ନିବେଦନ କରିଛନ୍ତି। ଦାବି ମୁତାବକ ଯଥାଶୀଘ୍ର ପାନୀୟଜଳ ଯୋଗାଣ ସମସ୍ୟା ସମାଧାନ କରାନଗଲେ ମାରୁତି ବିହାର ଓ ରାଧାଗୋବିନ୍ଦପୁର ବାସୀ ଆନ୍ଦୋଳନାତ୍ମକ ପନ୍ଥା ଆପଣେଇବାକୁ ବାଧ୍ୟ ହେବେ ବୋଲି ଚେତାଇ ଦେଇଛନ୍ତି ।
