ବିଶ୍ବ ଧଳାବାଡି ସପ୍ତାହର ଉଦଯାପନୀ ଦିବସ

 ଆଠଗଡ: ଆଠଗଡ ବ୍ଲକ କାର୍ଯ୍ୟାଳୟ ସମ୍ମିଳନୀ କକ୍ଷରେ ସୋମବାର ବିଶ୍ଵ ଧଳାବାଡି ସପ୍ତାହର ଉଦଯାପନୀ ଦିବସ  ଧରିତ୍ରୀ ଦିବ୍ୟାଙ୍ଗ ସ୍ଵୟଂ ସହାୟକ ଗୋଷ୍ଠୀ ଓ ରାଷ୍ଟ୍ରୀୟ ଦୃଷ୍ଟିହୀନ ସଂଘ ତରଫରୁ ପାଳନ କରାଯାଇଛି। ଏହି କାର୍ଯ୍ୟକ୍ରମରେ ବିଜେପି ନେତା ଅଭୟ କୁମାର ବାରିକ ମୁଖ୍ୟଅତିଥି, ସହକାରୀ ଜିଲ୍ଲାପାଳ ମାନସ ରଞ୍ଜନ ବେହେରା, ବିଡ଼ିଓ ବିଜୟ କେତନ ଚୌଧୁରୀ, ଆଇନଜୀବୀ ଜ୍ଞାନରଞ୍ଜନ ମହାପାତ୍ର, ଆଇନଜୀବୀ ପ୍ରମୋଦ କୁମାର ଜେନା, ରାଷ୍ଟ୍ରୀୟ ଦୃଷ୍ଟିହୀନ ସଂଘ ଓଡ଼ିଶା ଶାଖାର ସମ୍ପାଦକ ହରେକୃଷ୍ଣ ବେହେରା ଏବଂ ଓଡ଼ିଶା ଦୃଷ୍ଟିହୀନ ସଂଘର ପୂର୍ବତନ କାର୍ଯ୍ୟାଳୟ ସମ୍ପାଦକ କପିଳ ଚରଣ ସ୍ବାଇଁ ସମ୍ମାନିତ ଅତିଥି ଭାବରେ ଯୋଗଦେଇ ଉଦବୋଧନ ଦେଇଥିଲେ ।

ବିଶ୍ଵ ଧଳାବାଡି ଦିବସ ପାଳନର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ଆୟୋଜକ ଦୃଷ୍ଟିବାଧିତ ସଂଘର କର୍ମକର୍ତ୍ତା ଆଲୋକପାତ କରିଥିଲେ । ଦୃଷ୍ଟିବାଧିତଙ୍କ ବିଭିନ୍ନ ସମସ୍ୟା ଓ ସେମାନଙ୍କର  ଅଧିକାର ଉପରେ ଆଲୋଚନା କରାଯାଇଥିଲା । ଧଳାବାଡି ଦୃଷ୍ଟିବାଧିତ ବ୍ୟକ୍ତିଙ୍କ ପରିଚୟ ଓ ସାହାରା ବୋଲି ଅତିଥିଗଣ କହିବା ସହ ସେମାନଙ୍କୁ ସହଯୋଗର ହାତ ବଢାଇ ମୁଖ୍ଯସ୍ରୋତରେ ସାମିଲ କରିବା ଆମ ସମସ୍ତଙ୍କର ସାମାଜିକ ଦାୟିତ୍ବ ଓ ନୈତିକ କର୍ତ୍ତବ୍ଯ ବୋଲି ମତପ୍ରକାଶ କରିଥିଲେ । ଦୃଷ୍ଟିବାଧିତଙ୍କର ବିଭିନ୍ନ ସମସ୍ୟାର ସମାଧାନ ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିବେ ବୋଲି ମୁଖ୍ୟ ଅତିଥି ଶ୍ରୀ ବାରିକ ପ୍ରତିଶୃତି ଦେଇଥିଲେ ।

ଏହି କାର୍ଯ୍ୟକ୍ରମରେ ଓଡ଼ିଶାର କୋଣ ଅନୁକୋଣରୁ ବହୁସଂଖ୍ୟାରେ ଦୃଷ୍ଟିବଧିତ ବ୍ୟକ୍ତି ଯୋଗଦାନ କରିଥିଲେ । ସଭାକାର୍ଯ୍ୟ ଶେଷରେ ବିଶ୍ୱ ଧଳାବାଡି ସପ୍ତାହରେ ଜନସଚେତନତା ନିମନ୍ତେ ଦୃଷ୍ଟିବାଧିତଙ୍କର ଏକ ଶୋଭାଯାତ୍ରା ସହର ପରିକ୍ରମା କରିଥିଲା।