ଇମ୍ଫାଲ: ହିଂସାଗ୍ରସ୍ତ ମଣିପୁରରେ ନିୟୋଜିତ ଆସାମ ରାଇଫଲ୍ସର ଜଣେ ଯବାନ ନିଜ ସହର୍କମୀଙ୍କ ଉପରକୁ ଆଖିବୁଜା ଗୁଳି ଚଳାଇବା ପରେ ନିଜକୁ ଗୁଳି କରି ଦେଇଛନ୍ତି। ଏଥିରେ ୨ଜଣ ଯବାନଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୫ ଜଣ ଗୁରୁତର ଭାବେ ଆହତ ହୋଇଛନ୍ତି। ଆହତମାନଙ୍କ ଚିକିତ୍ସା ଜାରି ରହିଛି ଏବଂ ସେମାନଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ଜଣାପଡ଼ିଛି। ମଣିପୁର ଚନ୍ଦେଲ ଜିଲାର ସାଜିକ୍ ତମ୍ପାକ ଅଞ୍ଚଳରେ ମଙ୍ଗଳବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ବେଳେ ବୁଧବାର ପୁଲିସ ଏନେଇ ସୂଚନା ଦେଇଛି। ତେବେ ଆସାମ ରାଇଫଲ୍ସ ଦୁଇ ଯବାନଙ୍କ ମୃତ୍ୟୁ ନେଇ ଏପର୍ଯ୍ୟନ୍ତ ନିଶ୍ଚିତ ସୂଚନା ଦେଇନାହିଁ। ଅପରପକ୍ଷେ, ଏହି ଦୁର୍ଭାଗ୍ୟଜନକ ଘଟଣାକୁ ଜାରି ରହିଥିବା ଜାତୀୟ ବିବାଦ ସହ ଯୋଡ଼ିବା ଉଚିତ ନୁହେଁ ବୋଲି କହିଛି ମଣିପୁର ପୁଲିସ।
ସୂଚନା ଅନୁସାରେ, ମଙ୍ଗଳବାର ବିଳମ୍ବିତ ରାତିରେ ମଣିପୁରର ଚନ୍ଦେଲ ଜିଲାର ସାଜିକ୍ ତମ୍ପାକସ୍ଥିତ ରାନାଟପ୍ ପୋଷ୍ଟରେ ନିୟୋଜିତ ୧୫ ଆସାମ ରାଇଫଲ୍ସର ଜଣେ ଯବାନ ହାବିଲଦାର ସାଙ୍ଗପି ବାଇଟ ଅତର୍କିତ ଗୁଳି ଚାଳନା କରିଥିଲେ। ଖବର ଅନୁସାରେ, ନିଜ ସହକର୍ମୀଙ୍କୁ ଗୁଳି କରିବା ପୂର୍ବରୁ ଶିବିର ସ୍ଥଳରେ ସେମାନଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା। ଯୁକ୍ତିତର୍କ ସମୟରେ ସେ ହଠାତ୍ ତାଙ୍କ ସହକର୍ମୀଙ୍କ ଉପରକୁ ଆଖିବୁଜା ଗୁଳି ଚଳାଇଥିଲେ। ଏଥିରେ ଆସାମ ରାଇଫଲ୍ସର ୫ ଜଣ ଯବାନ ଆହତ ହୋଇଛନ୍ତି। ଏଥିସହ ୨ ଜଣ ଯବାନଙ୍କ ମୃତ୍ୟ ଘଟିଥିବା ମଧ୍ୟ ଜଣାପଡ଼ିଛି। ତେବେ ଆସାମ ରାଇଫଲ୍ସ ପକ୍ଷରୁ ଆନୁଷ୍ଠାନିକ ଭାବେ ଏନେଇ ସୂଚନା ଦିଆଯାଇନାହିଁ। ପୁଲିସ ସୂତ୍ରରୁ ପ୍ରାପ୍ତ ଖବର ଅନୁଯାୟୀ, ପରେ ସେ ନିଜକୁ ମଧ୍ୟ ଗୁଳି କରି ଆତ୍ମହତ୍ୟା କରିଛନ୍ତି। ଆହତ ଯବାନମାନଙ୍କୁ ହେଲିକପ୍ଟର ଯୋଗେ ଅଧିକ ଚିକିତ୍ସା ପାଇଁ ମିଲିଟାରୀ ହସ୍ପିଟାଲରେ ଭର୍ତ୍ତି କରାଯାଇଛି।
