ଆଇପିଏଲ ୨୦୨୧ର ନିଲାମ ପ୍ରକ୍ରିୟା ପୂର୍ବରୁ କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକରଙ୍କୁ ବଡ଼ ଝଟ୍କା ଲାଗିଛି। ଆଗାମୀ ବିଜୟ ହଜାରେ ଟ୍ରଫି ପାଇଁ ଅର୍ଜୁନଙ୍କୁ ମୁମ୍ବଇ ଟିମ୍ରେ ସ୍ଥାନ ମିଳିନାହିଁ। ୨୨ ସଦସ୍ୟ ବିଶିଷ୍ଟ ମୁମ୍ବଇ ଟିମ୍ରେ ସ୍ଥାନ ପକ୍କା କରିବାରେ ସେ ବିଫଳ ହୋଇଛନ୍ତି। ଚଳିତ ମାସରେ ଆରମ୍ଭ ହେବାକୁ ଥିବା ବିଜୟ ହଜାରେ ଟ୍ରଫି ପାଇଁ ମୁମ୍ବଇ ଟିମ୍ ଶ୍ରେୟସ ଆୟାରଙ୍କୁ ଅଧିନାୟକ ଦାୟିତ୍ଵ ଦେଇଛି।
ସୂଚନାଯୋଗ୍ୟ, ବାମହାତୀ ଦ୍ରୁତ ବୋଲର ୨୧ ବର୍ଷୀୟ ଅର୍ଜୁନଙ୍କୁ ଚଳିତବର୍ଷ ସୟଦ ମୁସ୍ତାକ ଅଲୀ ଟ୍ରଫିରେ ମୁମ୍ବଇ ଟିମ୍ ସୁଯୋଗ ଦେଇତିଲା। ଅର୍ଜୁନ ଏଲିଟ ଇ ଲିଗ୍ ଗ୍ରୁପ ମ୍ୟାଚରେ ନିଜର ପଦାର୍ପଣ କରିଥିଲେ ଏବଂ ସେ ୨ ଓଭର ବୋଲିଂ କରି ୨୧ ରନ୍ ବିନିମୟରେ ଗୋଟିଏ ଉଇକେଟ ହାସଲ କରିଥିଲେ।
ତେବେ ବିଜୟ ହଜାରେ ଟ୍ରଫି ପାଇଁ ମୁମ୍ବଇ ଟିମ୍ ନିଜର ୧୦୦ ସମ୍ଭାବ୍ୟ ଖେଳାଳିଙ୍କ ମଧ୍ୟରେ ଅର୍ଜୁନଙ୍କୁ ସାମିଲ କରିଥିଲା। କିନ୍ତୁ ଅଭ୍ୟାସ ମ୍ୟାଚରେ ତାଙ୍କ ପ୍ରଦର୍ଶନ ଖରାପ ରହିଥିଲା। ସେ ଟିମ୍ ତରଫରୁ ୪ଟି ମ୍ୟାଚ ଖେଳିଥିଲେ, ମାତ୍ର ଉଭୟ ବ୍ୟାଟିଂ ଏବଂ ବୋଲିଂରେ ସେ ଆଶାନୁରୂପ ପ୍ରଦର୍ଶନ କରିପାରି ନ ଥିଲେ। ୪ଟି ମ୍ୟାଚରେ ସେ ୪ଟି ଉଇକେଟ୍ ନେଇଥିବାବେଳେ ୩ଟି ମ୍ୟାଚରେ ବ୍ୟାଟିଂ କରି ୭ରନ୍ କରିବାରେ ସଫଳ ହୋଇଥିଲେ।
ଅର୍ଜୁନଙ୍କୁ ମୁମ୍ବଇ ଟିମ୍ରେ ସ୍ଥାନ ମିଳି ନ ଥିବାରୁ ଆଇପିଏଲ ଖେଳିବା ଆଶା ସଫଳ ହେବ କି ନାହିଁ ତାହା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଜୟ ହଜାର ଟ୍ରଫିରେ ସେ ଭଲ ପ୍ରଦର୍ଶନ କରିଥିଲେ ତାଙ୍କୁ ଆଇପିଏଲରେ କୌଣସି ଦଳ ସୁଯୋଗ ଦେବାର ସମ୍ଭାବନା ସୃଷ୍ଟି ହୋଇଥାନ୍ତା।
