ମାଘମାସର ପ୍ରଥମ ସୋମବାର, ବଡସିଂହାର ବେଶରେ ସଜ୍ଜିତ ହେଲେ ଆଖଣ୍ଡଳମଣି

ଆରଡି: ପବିତ୍ର ମାଘମାସର ପ୍ରଥମ ସୋମବାର ଓ ପୌଷପୂର୍ଣ୍ଣିମା ଅବସରରେ ଆରଡିପୀଠ ବାବା ଆଖଣ୍ଡଳମଣିଙ୍କ ମନ୍ଦିରରେ ଅନୁଷ୍ଠିତ ହୋଇଥିଲା ନୀତିକାନ୍ତି। ଭୋର ୫ଟରେ ଦ୍ବାରଫିଟା ନୀତି ସରିବା ପରେ ମଙ୍ଗଳ ଆଳତୀ, ଘର୍ଷଣଲାଗି, ଜଳାଭିଷେକ ନୀତି ସରିବା ପରେ ମଣିବାବାଙ୍କୁ ଦିଗମ୍ବର ବେଶରେ ସଜ୍ଜିତ କରାଯାଇ ପହିଲି ବାଲ୍ଯଭୋଗ ଲାଗି କରାଯାଇଥିଲା। ସକାଳ ୯ଟାରେ ପହଡଖିଆ ଅନ୍ନନୀତିଭୋଗ , ଦିବା ୧ଟାରେ ଯୋଗୀବେଶ ସହ ବଡ ଅନ୍ନନୀତି ଭୋଗ ଲାଗି କରାଯାଇଥିଲା।

ମଧ୍ୟାହ୍ନ ଅବକାଶ(ଶୟନ) ସମାପନ ହେବା ପରେ ମାଘମାସ ନୀତି ନିମନ୍ତେ ମଣିବାବାଙ୍କୁ ବିଭିନ୍ନ ଅଳଙ୍କାର ଓ ଫୁଲଚନ୍ଦନ ଦ୍ବାରା ବଡସିଂହାର ବେଶରେ ସଜ୍ଜିତ କରାଯାଇଥିଲା। ପୀଠରେ କୋଭିଡ କଟକଣା ବଳବତ୍ତର ରହିବା ସହ ୧୪୪ଧାରା ଜାରି ରହିଥିବାରୁ ଭକ୍ତଶୂନ୍ଯ ହୋଇପଡିଥିଲା ପୀଠ। ଅନ୍ଯପଟେ କୋଭିଡ କଟକଣା ଅନୁଯାୟୀ ଦିନତମାମ ସେବାୟତଙ୍କ ଦ୍ବାରା ସମସ୍ତ ନୀତିକାନ୍ତି ସମାପନ କରାଯାଇଥିଲା।