ଅନୁଗୁଳ : ଅନୁଗୁଳ ଜିଲ୍ଲା ପାଲଲହଡା ବ୍ଲକ ବତିସୁଆଁ ପଞ୍ଚାୟତ ଅନ୍ତର୍ଗତ ହାତୀମୁଣ୍ଡ ଗାଁରେ ଗତକାଲି ରାତିରେ ଘଟିଛି ଏକ ଅଭାବନୀୟ ଘଟଣା । ନାତିର ଠେଙ୍ଗା ମାଡ଼ରେ ଅଜାଙ୍କ ମୃତ୍ୟୁ ଘଟିଥିବା ଘଟଣା ସ୍ଥାନୀୟ ଆଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଅଭିଯୁକ୍ତ ନାତି ସମେତ ଆଉ ଜଣଙ୍କୁ ମଧ୍ୟ ଅଟକ ରଖିଛି ପୁଲିସ ।ସୂଚନା ଅନୁସାରେ ବତିସୁଆଁ ପଞ୍ଚାୟତ ହାତୀମୁଣ୍ଡ ଗାଁର ଧନୁରାମ ମହାକୁଡ଼, ଦୀର୍ଘ ବର୍ଷ ହେଲା ସେହି ଗାଁରେ ନିଜର ପୁଅ ,ବୋହୁ, ନାତି ଓ ନାତୁଣୀ ବୋହୁ ସହିତ ରହି ଆସୁଥିଲେ । ଗତ କିଛି ଦିନ ଧରି ନାତି ନବୀନ ମହାକୁଡ ପାରିବାରିକ ଗଣ୍ଡୋଗଳକୁ ନେଇ ଅଲଗା ରହି ଆସୁଥିଲେ । ଗତକାଲି କୌଣସି କାରଣକୁ ନେଇ ଉଭୟ ଅଜା ଓ ନାତି ମଧ୍ୟରେ ଗଣ୍ଡଗୋଳ ହୋଇଥିଲା । ନାତି ନବୀନ ମହାକୁଡ଼ ରାଗି ଯାଇ ଏକ ଠେଙ୍ଗାରେ ଧନୁରାମକୁ ଆକ୍ରମଣ କରିଥିଲା। ଫଳରେ ଷାଠିଏ ବର୍ଷୀୟ ବୃଦ୍ଧ ଧନୁରାମ ମୃତ୍ୟୁ ବରଣ କରିଥିଲେ । ଗାଁ ଲୋକଙ୍କ ସହାୟତାରେ ପାଲଲହଡା ପୁଲିସ ଖବର ପାଇ ଆଜି ସକାଳୁ ଘଟଣା ସ୍ଥଳରେ ପହଞ୍ଚିଥିଲା । ପୁଲିସ ହତ୍ୟା ଅଭିଯୁକ୍ତ ନାତି ନବୀନ ମହାକୁଡ଼କୁ ଘଟଣା ସ୍ଥଳରୁ ଗିରଫ କରିବା ସହ ଆଉ ଜଣେ ତାଙ୍କ ସମ୍ପର୍କୀୟ ଜ୍ୱାଇଁକୁ ଥାନାକୁ ଆଣି ଅଟକ ରଖିଥବା ଜଣାପଡ଼ିଛ । ପୁଲିସ ଘଟଣା ସ୍ଥଳରୁ ହତ୍ୟାରେ ବ୍ୟବହାର ହୋଇ ଥିବା ଠେଙ୍ଗାକୁ ମଧ୍ୟ ଜବତ କରିଛି । ଧନୁରାମର ମୃତ ଦେହକୁ ପାଲଲହଡା ଡାକ୍ତରଖାନାକୁ ଆଣି ଶବ ବ୍ୟବଚ୍ଛେଦ କରି ଅଧିକ ତଦନ୍ତ କରୁଥିବା ପୁଲିସ ପକ୍ଷରୁ ସୂଚନା ଦିଆଯାଇଛି । ଅଭିଯୁକ୍ତ ନବୀନ ମହାକୁଡ଼ ସିଧାସଳଖ ହତ୍ୟା କରିଥିବା ସ୍ୱୀକାର କରିଥିବା ବେଳେ ତାର ସ୍ତ୍ରୀକୁ ଅନେକ ଥର ଦୁର୍ଭାଵ୍ୟବାର କରୁଥିବାରୁ ହତ୍ୟା କରିଥିବା ପ୍ରକାଶ କରିଛି । ଅନ୍ୟପକ୍ଷରେ ତାଙ୍କ ସ୍ତ୍ରୀ ମଧ୍ୟ ସମାନ ଅଭିଯୋଗ କରିଛି । ତଦନ୍ତ ପରେ ହତ୍ୟାକାଣ୍ଡର ସତ୍ୟାସତ୍ୟ ଜଣା ପଡିବ ବୋଲି ପୁଲିସ କହିଛି ।
Comments are closed.