୬୯ ତମ ଅନ୍ତର୍ଜାତୀୟ ପ୍ରତିଯୋଗିତା ମିସ୍ ୟୁନିଭର୍ସ ବା ବ୍ରହ୍ମାଣ୍ଡ ସୁନ୍ଦରୀ-୨୦୨୦ର ବିଜେତା ହୋଇଛନ୍ତି ମେକ୍ସିକୋର ଏଣ୍ଡ୍ରିଆ ମେଜା। ବ୍ରାଜିଲର ଜୁଲିୟା ଗାମାଙ୍କୁ ପଛରେ ପକାଇ ସେ ଏହି ମୁକୁଟ ପିନ୍ଧିଛନ୍ତି। ପୂର୍ବତନ ବ୍ରହ୍ମାଣ୍ଡ ସୁନ୍ଦରୀ ଜୋଜିବିନି ତୁଞ୍ଜି ଏଣ୍ଡ୍ରିଆଙ୍କୁ ବ୍ରହ୍ମାଣ୍ଡ ସୁନ୍ଦରୀ ମୁକୁଟ ପିନ୍ଧାଇଛନ୍ତି। ଅନ୍ୟପଟେ ଭାରତରୁ ପ୍ରତିଯୋଗିତାରେ ଅଂଶଗ୍ରହଣ କରିଥିବା ୨୨ ବର୍ଷୀୟ ଏଡଲିନ୍ କାଷ୍ଟଲିନା ପ୍ରତିଯୋଗିତାରେ ୫ମ ସ୍ଥାନରେ ରହିଛନ୍ତି। ଏହି ସମାରୋହର ଗ୍ରାଣ୍ଡ ଫିନାଲେ ଫ୍ଲୋରିଡାର ସୋମିନୋଲ ହାର୍ଡ ରକ୍ ହୋଟେଲ ଆଣ୍ଡ କ୍ୟାସିନୋରେ ଆୟୋଜିତ ହୋଇଥିଲା।
ପ୍ରତିଯୋଗିତାର ଶେଷ ପର୍ଯ୍ୟାୟରେ ଏଣ୍ଡ୍ରିଆଙ୍କୁ ପ୍ରଶ୍ନ କରାଯାଇଥିଲା ଯେ, ଯଦି ଅପଣ ଦେଶର ନେତା ହୋଇଥାନ୍ତେ, ତେବେ କରୋନା ଭୂତାଣୁ ମହାମାରୀର କିପରି ମୁକାବିଲା କରିଥାନ୍ତେ ? ଏହାର ଉତ୍ତରରେ ଏଣ୍ଡ୍ରିଆ କହିଥିଲେ ଯେ, ଏଭଳି କଠିନ ପରିସ୍ଥିତିକୁ ସମ୍ଭାଳିବା ଲାଗି କୌଣସି ସଠିକ୍ ପଦ୍ଧତି ନାହିଁ। ମାତ୍ର ସ୍ଥିତି ବିଗିଡ଼ିବା ପୂର୍ବରୁ ତାଲାବନ୍ଦ ଲାଗୁ କରାଯାଇଥିଲେ, ଏତେ ଜୀବନହାନୀ ହୋଇ ନ ଥାନ୍ତା। ଲୋକଙ୍କ ଜୀବନ ଏପରି ନଷ୍ଟ ହେବା ଦେଖିପାରିବୁ ନାହିଁ। ସେଥିଲାଗି ପ୍ରାରମ୍ଭିକ ପର୍ଯ୍ୟାୟରୁ ସ୍ଥିତିକୁ ନିୟନ୍ତ୍ରଣ କରିବା ଲାଗି ଉଦ୍ୟମ କରିଥାନ୍ତି ବୋଲି ଏଣ୍ଡ୍ରିଆ ଜବାବ ଦେଇଥିଲେ।
