ମୁଜାଫରପୁରରେ ପହଞ୍ଚିଲେ ଶିଶୁରୋଗ ବିଶେଷଜ୍ଞଙ୍କ ୫ଟି ଦଳ ସହ ଅତିରିକ୍ତ ଡାକ୍ତରୀ ଦଳ

ମୁଜାଫରପୁର : କେନ୍ଦ୍ରରୁ ବରିଷ୍ଠ ଶିଶୁରୋଗ ବିଶେଷଜ୍ଞ ଏବଂ ପାରା ମେଡିକାଲ ୱାର୍କରଙ୍କ ୫ଟି ଦଳ ବୁଧବାର ମୁଜାଫରପୁରରେ ପହଞ୍ଚିଛନ୍ତି । ଘାତକ ଜାପାନୀ ଜ୍ବର ସଂକ୍ରମଣକୁ ରୋକିବା ପାଇଁ ଏମାନେ ସହଯୋଗ କରିବେ। କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡକ୍ଟର ହର୍ଷ ବର୍ଦ୍ଧନଙ୍କ ସମୀକ୍ଷା ପରେ ଏହି କେନ୍ଦ୍ରୀୟ ଦଳକୁ ମୁଜାଫରପୁର ପଠାଯାଇଛି। ଅନ୍ୟପକ୍ଷରେ ପାଟନା ଓ ଦରଭଙ୍ଗା ମେଡ଼ିକାଲ କଲେଜ ହସ୍ପିଟାଲ୍‍ର ୧୪ ଜଣିଆ ଅତିରିକ୍ତ ଡାକ୍ତରୀ ଦଳ ବୁଧବାର ମୁଜାଫରପୁରରେ ପହଞ୍ଚିଛନ୍ତି । ଶ୍ରୀକ୍ରିଷ୍ଣ ମେଡିକାଲ କଲେଜ ହସ୍ପିଟାଲ ଡାକ୍ତରୀ ଦଳ ସହ ଏମାନେ ଘାତକ ଜାପାନୀ ଜ୍ବର ପିଡୀତ ଶିଶୁଙ୍କୁ  ଚିକିତ୍ସା କରିବେ। ମସ୍ତିଷ୍କ ଜ୍ୱରରେ ଆକ୍ରାନ୍ତ ଶିଶୁମାନଙ୍କର ଉତ୍ତମ ଚିକିତ୍ସା ପାଇଁ ଏହି ଡାକ୍ତରମାନେ ସେଠାକୁ ଯାଉଛନ୍ତି। ମସ୍ତିଷ୍କ ଜ୍ୱରରେ ଆକ୍ରାନ୍ତ ଶିଶୁମାନଙ୍କ ସଂଖ୍ୟା ଅଧିକ ମାତ୍ରାରେ ବୃଦ୍ଧି ପାଇଥିବା ଯୋଗୁଁ ଦିନରାତି ୨୪ଘଣ୍ଟା ଡାକ୍ତରୀ ସେବା ଉପଲବ୍ଧ କରାଇବା ସକାଶେ ମୁଖ୍ୟମନ୍ତ୍ରୀ ନୀତିଶ କୁମାର ନିର୍ଦ୍ଦେଶ ଦେଇଥିଲେ। ବର୍ତ୍ତମାନ ୩୪ ଜଣ ଡାକ୍ତର ଶିଶୁମାନଙ୍କର ଚିକିତ୍ସା କରୁଛନ୍ତି । ମୁଜାଫରପୁରରେ ମଧ୍ୟ ମାଗଣା ଆମ୍ବୁଲାନ୍ସ ସେବା ଆରମ୍ଭ କରାଯାଇଛି।